मंगलबार सिंहदरबारमा मन्त्री तथा सचिवहरूलाई विशेष निर्देशन दिँदै प्रधानमन्त्री ओलीले यस्तो बताएका हुन् । उनले सरकारका ’boutमा ढुक्क हुन भनेका छन् । ‘यो सरकारमा पनि कति दिन हो र ? अस्ति कसले तिथि तोक्दै गरेको सुनेको थिएँ, राजनीतिक ज्योतिषी पल्टिँदै थिए,’ ओलीले भने, ‘मेरो नेतृत्वमा २ वर्ष चल्ने हो, मैले २ वर्ष पुग्नु एक साताअघि नै राजीनामा गरिसकेको हुनेछु ।’ उनले नेपाली कांग्रेसका सभापति शेरबहादुर देउवाको नेतृत्वमा निर्वाचनमा जाने बताए ।

उनले सरकार ढल्ने त के ढलपलसमेत नहुने ठोकुवा गरे । अहिलेको सरकार स्थिरता भएको सरकार भनी उनले विश्वास दिलाए । ‘सरकार कुनै पनि प्रकारको दाउपेच, केका लागि छिर्के लगाएर बनेको होइन, कर्तव्यबोध गरेर बनाएको हो, ठूला पार्टीले सुझबुझ गरेर बनाएको हो,’ प्रधानमन्त्री ओलीले भने, ‘यो सरकार ढल्ने त के ढलपल पनि हुँदैन ।’

प्रधानमन्त्री ओलीले मुलुकको विकास र समृद्धिका लागि लक्ष्य तोकेर नतिजामुखी भएर काम गर्न सबै मन्त्रालयका मन्त्री र सचिवलाई निर्देशन दिए । विद्यमान ऐन कानुनको अधीनमा रही आफूलाई तोकिएको जिम्मेवारी समयमा पूरा गर्न उनले निर्देशन दिए ।

उनले सबै मन्त्री, सचिव तथा आयोजना प्रमुखलाई कार्यसम्पादन सम्झौता गर्ने र अधिकारको प्रत्यायोजन गरेर अघि बढ्न पनि निर्देशन दिए । नागरिकका लागि सहज सेवा प्रवाहलाई पहिलो प्राथमिकतामा राखेर अघि बढ्न उनको निर्देशन थियो । उनले हरेक दिन, साता, महिना, त्रैमास, अर्धवार्षिक, वार्षिक र आवधिक योजना र लक्ष्य निर्धारण गरेर अघि बढ्नुपर्नेमा जोड दिए ।

प्रधानमन्त्री ओलीले विभिन्न निकायमा सेवा लिन लाइन लाग्नुपर्ने अवस्था अन्त्य गर्न र झन्झटरहित सेवाप्रवाहको व्यवस्था मिलाउन पनि निर्देशन दिए । चालक अनुमतिपत्र, राहदानी, राष्ट्रिय परिचयपत्र सहज रूपमा पाउने व्यवस्था गर्न उनले निर्देशन दिएका छन् ।

‘आइतबार सचिवहरूबाट पनि केही कुराहरू आएका थिए, त्यो पर्याप्त छैन,’ प्रधानमन्त्री ओलीले भने, ‘संविधान र कानुनको अधीनमा रही मुलुक र जनताको हितमा काम गर्नुहोस् ।’ प्रधानमन्त्री ओलीले अहिलेको काम सन्तोषजनक नभएको भन्दै प्रभावकारी रूपमा काम गर्न निर्देशन दिए । ‘मैले विद्यमान अवस्था सन्तोषजनक नरहेकाले सरकार परिवर्तन भएको भनेको थिएँ,’ प्रधानमन्त्री ओलीले भने, ‘यतिबेला सरकारमा संसद्का ठूला दुई दल छन्, यी दुई पार्टीले सामाजिक र आर्थिक परिवर्तनमा योगदान गरेका छन्, यी दुई ठूला दल कहिले आकारमा सानो भए पनि यिनको इतिहास, योगदान, दृष्टिकोण र सामथ्र्य भने ठूलो छ ।’

प्रधानमन्त्री ओलीले सरकारसामु असाधारण चुनौती रहेको उल्लेख गर्दै सरकारलाई असफल हुने छुट नभएको बताए । ‘यो अन्तिम आशा (लास्ट होप) हो, यो सरकार असफल हुन बनेको पनि होइन, सरकार जसरी पनि सफल हुन्छ,’ उनले भने, ‘हामी हातमा हात बाँधेर मात्र बस्यौं भने सफल भइँदैन, भाग्यमा छ भन्दैमा डोकोमा दूध दुहुन सकिन्न, यसका लागि प्रतिबद्धता चाहिन्छ ।’

प्रधानमन्त्री ओलीले नेपालको आफ्नै पानीजहाज र रेल सञ्चालन गर्ने विषयमा भएको प्रगति माग गरेका छन् । उनले सम्भावित अध्ययन भएका ठाउँमा पानीजहाज चलाउने उल्लेख गर्दै सोहीअनुसार काम गर्न निर्देशन दिए ।

यस्तै, ओलीले कर्मचारीले निर्णय गर्न डराउने अवस्था हट्ने भन्दै निर्णय गर्दा फसिन्छ भन्ने मानसिकता त्याग्न र कुनै पनि प्रकारको असुरक्षा महसुस नगर्न आग्रह गरे । ‘हाम्रो गन्तव्य नेपाललाई समृद्ध बनाउनु हो र नेपालीलाई सुखी बनाउनु र गरिबी हटाउनु हो, प्रधानमन्त्री ओलीले भने, ‘२० प्रतिशतभन्दा बढी जनसंख्या गरिबीमा छ, केही वर्षभित्रै हामीले यसलाई अन्त्य गर्नुपर्छ, त्यसका लागि सबैले आ–आफ्नो जिम्मेवारी पूरा गरौं ।’

प्रधानमन्त्री ओलीले खपतका लागि आयात बढिरहेको उल्लेख गर्दैै आन्तरिक उत्पादन र उत्पादकत्व बढाउनुपर्नेमा जोड दिए । ‘दैलेखमा पेट्रोलियम पदार्थको खानी उत्खनन् गरी आन्तरिक खपत गर्ने मात्र होइन, निर्यात गर्न सक्ने’bout हामीले योजना बनाउनुपर्छ,’ उनले भने । जलविद्युत् र हाइड्रोजनलगायतको ऊर्जा उत्पादनको अपार सम्भावना मुलुकमा रहेको उनको जिकिर थियो । ‘हामीसँग खानेपानीको ब्रान्डिङ गरेर निर्यात गर्न सक्ने अथाह सम्भावना छ, त्यो सम्भावनालाई यथार्थमा बदल्नुपर्छ,’ प्रधानमन्त्री ओलीले भने ।

ओलीले नियमित कामका लागि बैठक भत्ता किन चाहियो भन्दै प्रश्नसमेत गरे । हाम्रो जस्तो गरिब मुलुकमा यस्ता कुराले ठूलो दायित्व सिर्जना गर्ने भन्दै अनावश्यक भत्ता नलिन उनको आग्रह थियो ।

सन् २०३० सम्ममा दिगो विकासका लक्ष्य प्राप्त गर्नका लागि तोकिएका लक्ष्य पूरा गर्न सबै मन्त्रालय र निकायले आ–आफ्नो दायित्व तथा जिम्मेवारी पूरा गर्नुपर्ने ओलीको निर्देशन थियो । नेपालमा ठूला दरका भारतीय नोट २५ हजारभन्दा बढी बोक्न नमिल्ने व्यवस्थालाई संशोधन गरिनुपर्ने पनि ओलीको भनाइ थियो ।

बजेट कार्यान्वयनको अवस्था हेर्दा चालू खर्च शतप्रतिशत गर्ने तर पुँजीगत खर्च आधा पनि गर्न नसक्ने व्यवस्थाको अन्त्या हुनुपर्नेमा जोड दिँदै उनले निर्माण व्यवसायीले पाउनुपर्ने रकम, दुग्ध किसानको भुक्तानीको समस्या तत्काल समाधान गर्न पनि निर्देशन दिए । त्यस्तै, उनले कृषि बिमाको अनुदान रोकिएको विषयलाई गम्भीर रूपमा लिन निर्देशन दिए । व्यवसायीले भ्याट फिर्ताको रकम नपाएको गुनासो सम्बोधन गर्न उनले जोड दिए ।

कृषि मन्त्रालयअन्तर्गत सञ्चालित सामूहिक अनुदानका कार्यक्रम आवश्यक रहे पनि व्यक्तिगत अनुदानका सबै कार्यक्रम बन्द गर्न प्रधानमन्त्री ओलीले निर्देशन दिए । त्यस्तै, सञ्चालित योजना तथा कार्यक्रम कार्यान्वयनको अवस्था’bout नियमित अनुगमन निरीक्षण गर्न पनि उनको निर्देशन थियो । ठूला तथा राष्ट्रिय गौरबका आयोजनाका काममा ढिलासुस्ती भएको विषय उठाउँदै ओलीले कानुनी रूपमा समस्या परेको भए त्यसलाई सहजीकरण गरेर काम अगाडि बढाउन निर्देशन दिए ।

सरकारले चाँडै सगरमाथा संवाद आयोजना गर्ने पनि प्रधानमन्त्री ओलीले जानकारी दिए । पछिल्ला केही वर्षदेखि रोकिएको राष्ट्रिय प्रतिभा पुरस्कार वितरण प्रक्रिया अगाडि बढाउन पनि उनले निर्देशन दिए । राजस्व चुहावट नियन्त्रणका लागि जिम्मेवार भएर लाग्न निर्देशन दिँदै प्रधानमन्त्री ओलीले करको दरभन्दा पनि दायरा बढाउँदै लग्नुपर्नेमा जोड दिए । प्रधानमन्त्रीले मौद्रिक नीतिले राम्रो प्रभाव देखाएको र बजार पनि चलायमान हुन थालेको बताए । पुँजी बजार मात्र होइन सबै क्षेत्र बिस्तारै सुधार हुँदै जाने विश्वास पनि उनले दिलाए ।

यस्तै, प्रधानमन्त्री ओलीले चाँडोभन्दा चाँडो धरहरा निर्माण पूरा गरी सञ्चालन गर्न निर्देशन दिए । ‘धरहरा बनेको छ, मान्छे चढ्न पाएका छैनन्, काम कहाँनिर अड्कियो र के भएर रोकिएको छ ? त्यसलाई किन सञ्चालन नगर्ने ? कुन मन्त्रालयको जिम्मेवारीभित्र पर्छ, छुट्टै कार्यविधि बनाएर तत्काल सञ्चालन गर्न म निर्देशन दिन्छु,’ प्रधानमन्त्री ओलीले भने ।

प्रधानमन्त्री ओलीले अब प्रत्येक मन्त्रीको सय दिनको कार्यप्रगति खोजिने पनि उल्लेख गरे । त्यसैले उनले दिन रात नभनी काम गर्न मन्त्रीहरूलाई निर्देशन दिए । ‘सय दिनमा के काम गर्ने हो स्पष्ट भएर अघि बढ्नुहोला, आ–आफ्नो मन्त्रालयले के ग¥यो भनेर सय दिनमा प्रतिवेदन बनाउनुपर्छ,’ प्रधानमन्त्री ओलीले भने, ‘प्रतिवेदनमा लेखिने कामहरू सन्तोषजनक र चित्तबुझ्दो हुनुपर्छ ।’