चितवन, चैत ४ | चितवनमा म्यादी प्रहरीका लागि भर्ना खुलेको छ । स्थानीय तहको निर्वाचन–२०७९ लाई लक्षित गर्दै चितवनमा म्यादी प्रहरीको भर्ना प्रकृया थालिएको हो । जिल्ला प्रहरी कार्यालय चितवनले वैशाख ३० गते हुने स्थानीय तहका निर्वाचनका लागि आवश्यक पर्ने म्यादी प्रहरीका लागि दरखास्त दिन आब्हान गरेको छ ।
सरकारले देशभरबाट म्यादी प्रहरीको भर्ना माग गरेको र चितवनमा मात्रै १७ सय ९ जनाको लागि आवेदन खुल्ला गरिएको जिल्ला प्रहरी कार्यालय चितवनका प्रवक्ता डिएसपी नरहरी अधिकारीले नारायणी अनलाइनलाई जानकारी दिए । उनका अनुसार चैत ६ गतेदेखि ११ गतेसम्म जिल्ला प्रहरी कार्यालयमा उपस्थित भएर दरखास्त दिन सकिनेछ ।
म्यादी प्रहरीका लागि १८ वर्ष पुरा भई ५४ वर्ष ननाघेका नेपाली नागरीकले दर्खास्त बुझाउन सक्ने अधिकारीले बताए । नेपाल सरकारले छनेट गर्ने छनेट प्रक्रियामा विशेष गरी पूर्व नेपाल प्रहरी, ससस्त्र प्रहरी, नेपाली सेनालाई प्रथमिकता दिइने उनको भनाई छ ।
भर्ना भएका म्यादी प्रहरीले ४० दिन काम गर्न पाउनेछन । ४० दिनसम्मको मासिक ३० हजार २४० रुपैयाँ पारिश्रमिक निर्धारण गरिएको छ । पारिश्रमिकका साथै प्रत्येक म्यादी प्रहरिले खाद्यान्नवापत ७ हजार २००,पोशाक र अन्य खर्च गर्ने गरि ६ हजार, यातायात खर्चवापत एक हजार र बिमा सुविधासमेत उपलब्ध गराइने व्यवस्था गरिएको छ ।
