चितवन । नेपाली कांग्रेस रत्ननगर नगरपालिका वडा नं १२ वडा पार्टी कार्यालय लोडफोड गरिएको छ। गठबन्धनका दलहरु बीच वडा बाँडफाँड गर्दा सो वडामा वडाध्यक्ष माओवादी केन्द्रको भागमा परेपछि आक्रोसित कांग्रेसका कार्यकर्ताहरुले पार्टी कार्यालय तोडफोड गरेका हुन्। कार्यकर्ताहरुले कार्यालय तोडफोड गरी पार्टीको झण्डा सडकमा समेत फालेका छन्।
कांग्रेस कार्यकर्ताहरुले पार्टी कार्यालय तोडफोड गरी कार्यालयमा राखेको कुर्ची-टेबुल तथा पार्टीको झण्डा सडकमा फालेका हुन्। नेपाली कांग्रेस नगर समितिकी सचिव अनिता अर्याललाई सो वडाको वडाध्यक्षको टिकट दिइएको थियो। २०७४ सालको निर्वाचनमा जितेको वडा आफूले पाउनुपर्ने अडान कांग्रेसको थियो।
अन्तिम अवस्थामा दलहरुबीच सहमति गर्दा सो वडा माओवादी केन्द्रको भागमा परेको हो। वडाध्यक्षमा नेतृ अर्याल वडा सदस्यको उमेदवार चयन गरी निर्वाचनमा होमिएको वडा समिति अन्तिम अवस्थामा पछि हट्नु परेपछि नेता तथा कार्यकर्ता आक्रोसित भएका हुन्।
सो वडामा गठवन्धनको निर्णय नमान्ने र अर्यालको नेतृत्वमा निर्वाचनमा जाने निर्णय भएको छ।
