काठमाडौं,जेठ १४ : नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेका अध्यक्ष केपी शर्मा ओलीलाई अबको चुनावपछि प्रधानमन्त्री भएर देखाउन चुनौती दिएका छन्। प्रतिनिधि सभाको शनिबारको बैठकमा सरकारको नीति तथा कार्यक्रममाथिको छलफलमा सहभागी हुँदै प्रचण्डले ओली दुई–दुईपटक आफू र आफ्नो पार्टीको सहयोगमा प्रधानमन्त्री भएको बताए।
ओलीलाई संकेत गर्दै प्रचण्डले भने, माओवादी केन्द्रकै सहयोगमा प्रधानमन्त्री हुनुभएको उहाँ। एक्लै भएको छु भन्ने ठान्नुभएको छ भने त्यो भ्रम हटाइदिनोस्। तपाईं एक्लै प्रधानमन्त्री हुनुभएकै छैन। प्रचण्डले ओली माओवादी केन्द्रको वैशाखी टेकेर प्रधानमन्त्री भएको टिप्पणी गरे । पहिलोचोटी पनि माओवादी केन्द्रको तपाईंको भाषामा वैशाखी टेकेर हुनभा हो। दोस्रोपटक हाम्रो पनि भोट लिएर हुनुभा हो। अब भएर देखाउनोस् त १ अबको चुनावबाट देखाउनोस् तपाईंलाई मानिन्छ।
