नेकपा एमालेका सांसद लालबाबु पण्डितले सरकारले आगामी आर्थिक वर्षको लागि ल्याएको बजेटमा खुसी, आशा, उत्साह र भरोसा नभएको टिप्पणी गरेका छन्।
बुधबार प्रतिनिधिसभा बैठकमा आगामी आर्थिक वर्षको बजेटमाथिको छलफलमा भाग लिँदै उनले वित्तीय लगानी र विकासखर्च घटाएर सम्बृद्धि नआउने बताएका हुन्।
बजेट ६ महिनाको लागि मात्रै चुनावी प्रचार र नाराको रूपमा ल्याइएको उनको आरोप छ।
निर्वाचनपछि पूरक बजेट लिएर आउनुपर्ने भएकाले अर्थतन्त्र खुम्चिएको र विश्वास कायम गर्न नसक्ने अवस्थामा प्रतिपक्षको तर्फबाट कुरा राख्दा सरकारले नबुझेको उनले बताए।
उनले भने, ‘बजेटले हुने खाने र निजी क्षेत्रलाई बढी पोसेको छ। लोभ्याउने गुलियो नाराको रूपमा आएको छ। सामाजिक सुरक्षा भत्ता अरबपतिले पाएका छन्। विकासका अधुरा योजना पूरा भएका छैनन्। त्यहाँ पर्याप्त विकासका योजना पुगेका छैनन्।’
छलफलका क्रममा पण्डितले अर्थमन्त्री जनार्दन शर्मालाई प्रश्न पनि गरे, ‘अर्थमन्त्रीज्यू काठमाडौँबाट चितवन हेलिकप्टरमा झुन्डिएर जाने हो? कति बजेट छुट्याइएको हो? के भन्न खोज्नुभएको हो? ’
