चितवन, जेठ २१ :स्थानीय तहमा निर्वाचित जनप्रतिनिधिलाई नेपाली कांग्रेस चितवन क्षेत्र नम्बर ३ ले सम्मान गरेको छ ।क्षेत्र नम्बर ३ अन्र्तगत रहेको भरतपुर महानगरपालिका र माडी नगरपालिकामा कांग्रेसबाट निर्वाचित भएकाहरुलाई क्षेत्रीय समितिले सम्मान गरेको हो ।
कार्यक्रममा कांग्रेसले जनताको मत जित्ने गरी काम गर्न आग्रह गरेको छ । मुलुकमा कांग्रेसको विकल्प नरहेको भन्दै जनताप्रति समर्पित हुन नेताहरुले जनप्रतिनिधिलाई आग्रह गरेका छन् । पार्वतीपुरमा आयोजित कार्यक्रममा कांग्रेसका प्रवक्ता डा. प्रकाशशरण महतले सम्मानपत्र प्रदान गरेका थिए । उनले पार्टीको सिद्धान्तमा विचलित नभई जनतामा समर्पित हुन निर्देशन दिए । क्षेत्रअन्र्तगतका जनप्रतिनिधिलाई जिम्मेवार रहन आग्रह गर्दै बधाईसहितको सम्मान गरिएको क्षेत्रीय सभापति लालबहादुर दवाडीले बताए ।
क्षेत्र नम्बर ३ अन्र्तगत भरतपुर महानगरपालिकाका प्रमुख चित्रशेन अधिकारी र माडी नगरपालिकाका उपप्रमुख खेम महतो सहित १२ जना वडाध्यक्ष र ५३ वडासदस्य सहित क्षेत्र नम्बर ३ मा निर्वाचित ६७ जनालाई सम्मान गरेको हो ।
कार्यक्रममा नेपाली कांग्रेसका केन्द्रीय सदस्य दिनेश कोइराला, जिल्ला सभापति राजेश्वर खनाल, निवर्तमान जिल्ला सभापति जीतनारायण श्रेष्ठ, बाग्मती प्रदेशका उद्योग वाणिज्य तथा आपूर्ति मन्त्री मिलनबाबु श्रेष्ठ, कांग्रेसका बाग्मती प्रदेश सदस्य कैलाश कोइराला, महासमिति सदस्य विजयराज भुसाल, कांग्रेसका क्षेत्र नम्बर १ का सभापति किरणभूषणसिंह ओली, भरतपुर महानगरपालिकाका उपप्रमुख चित्रसेन अधिकारी, माडी नगरपालिकाका उपप्रमुख खेम महतो, भरतपुर २१ का सभापति कृष्णकान्त भण्डारी, भरतपुर १४ का वडाध्यक्ष राजेन्द्र साँखी , प्रदेश ३ ‘ख’ का सभापति शोभाखर चापागाइँ लगायतले बोलेका थिए ।
