चितवन – जिल्ला निर्वाचन कार्यालय चितवनले स्थानीय तह निर्वाचनका उम्मेदवारहरुलाई खर्च विवरण बुझाउन आग्रह गरेको छ । कार्यालयले आज (आइतबार) सूचना जारी गर्दै निर्वाचनको परिणाम घोषणा भएको ३० दिन भित्र महानगरपालिका, नगरपालिका र गाउँपालिकाका बिभिन्न पदका उम्मेदवारहरुलाई खर्च विवरण पेश गर्न भनेको हो ।
निर्वाचन नियमावली २०७३ को नियम ४० बमोजिम स्थानीय तह निर्वाचनका प्रत्येक उम्मेदवारले वा निजको प्रतिनिधिले निर्वाचन अवधिमा भएको खर्चको विवरण परिणाम घोषणा भएको ३० दिन भित्र बुझाईसक्नुपर्ने जिल्ला निर्वाचन अधिकृत भिमसेन कार्कीले जानकारी दिए । सोही अनुसार ३० दिन भित्र स्थानीय तह निर्वाचन नियमावली २०७३ को अनुसूची ३० बमोजिमको ढाँचामा खर्च विवरण पेश गर्न सूचित गरिएको उनले बताए ।
सम्बन्धित पालिकाको अन्तिम मत परिणाम घोषणा भएको ३० दिन भित्र खर्च विवरण पेश गर्नुपर्ने उनले बताए । ‘सम्बन्धित पालिकाको परिणाम घोषणा भएको ३० दिन भित्र खर्च विवरण बुझाईसक्नु पर्छ । यो अवधिमा सबैले बुझाउनुहुन्छ होला’, उनले भने ।
गत बैशाख ३० गते सम्पन्न स्थानीय तह निर्वाचनमा चितवनका ७ पालिकामा एक हजार ९२६ जना उम्मेदवार थिए । उनीहरु मध्ये पाँच सय चार जना निर्वाचित भएका छन् ।
