भरतपुर । चितवनमा अझै पनि फाटफुट मात्रामा कोरोना देखिएको छ । गत वर्ष अन्तिमपटक ०७७ फागुन २७ गते कोरोना सङ्क्रमित भेटिएकोमा झन्डै दुई महिनापछि पुनः सङ्क्रमित फेला परेका थिए । वैशाख २० गते पुनः दुई जनामा सङ्क्रमण देखिएको थियो ।
वैशाख २० पछि एकपटकमा बढीमा ४ जनामा सङ्क्रमण देखिएको छ । जेठ १ गते ३ जना सङ्क्रमित भेटिएकोमा जेठ ४ गते एक जनामा भेटियो । जेठ ८ गते सङ्क्रमित संख्या पुनः शून्य भयो । तर, जेठ ११ गते २ जनामा सङ्क्रमण भेटियो । पछिल्लोपटक जेठ १८ गतेदेखियता कोही पनि सङ्क्रमित नरहेको जिल्ला स्वास्थ्य कार्यालय चितवनले जनाएको छ ।
‘एक महिनाको अवधिमा फाटफुट मात्रामा कोरोना सङ्क्रमित भेटिएका छन्’, स्वास्थ्य कार्यालय चितवनका प्रमुख रामकुमार केसीले भने । सङ्क्रमणको लक्षण भएको तर परीक्षण नगराएकाहरु पनि समाजमा हुन सक्ने भन्दै प्रमुख केसीले शून्य भन्न सकिने तर सङ्क्रमणमुक्तचाहिँ भन्न नमिल्ने बताए । पछिल्लोपटक देखिएकाहरुले होम आइसोलेसनमा बसेर स्वास्थ्यलाभ गरेको कार्यालयले जनाएको छ ।
कोरोनाको असर कम भएको कारणले अस्पतालभन्दा पनि घरमै आइसोलेसनमा स्वास्थ्यलाभ लिइरहेको भरतपुर अस्पतालका सूचना अधिकारी गोपाल पौडेलले बताए ।
जिल्लाका कोरोना सङ्क्रमित उपचार गर्ने अस्पतालहरुमा सङ्क्रमित छैनन् । सङ्क्रमितको उपचार गर्दै आएको दुईवटा मेडिकल कलेज र भरतपुर केन्द्रीय अस्पतालमा सङ्क्रमित नरहेको सम्बन्धित अस्पतालहरुले जनाएका छन् । भरतपुर अस्पतालका सूचना अधिकारी पौडेलले कोरोना सङ्क्रमितको संख्या घट्दै गएकाले उनीहरुको उपचारका लागि व्यवस्था गरिएको बेडमा अन्य खालका बिरामीको उपचार दिन थालिएको बताए ।
कोरोना सङ्क्रमित र यसको जोखिम कम भएकाले नागरिक पनि कोरोनापूर्वको जस्तै अवस्थामा जीवनशैली अपनाउन थालेका छन् । कोरोना नहुँदाको अवस्थामा पनि साबुनपानीले पटकपटक हात धुने, मास्क लगाउने, भौतिक दूरी कायम गर्ने कुराहरु अन्य रोगको सङ्क्रमणबाट बच्नका लागि पनि त्यति नै उपयुक्त क्रियाकलाप रहेको भन्दै वरिष्ठ फिजिसियन डा. कालिदास अधिकारीले स्वस्थ जीवनशैलीका लागि राम्रा कामलाई निरन्तरता दिनुपर्ने बताए । ‘कोरोना कतिखेर फैलिन्छ थाहा हुन्न’, डा। अधिकारीले भने, ‘सावधान हुनुपर्छ, अन्य रोगको सङ्क्रमण हुन नदिन पनि कोरोना जोखिमबाट बच्ने उपायहरु अपनाउन आवश्यक छ ।’
