चितवन । भरतपुर महानगरपालिकाले महानगरवासीको लागि सबै प्रकारको कर अनलाइनबाटै बुझाउन सकिने व्यवस्था मिलाएको छ। अनलाइन कर प्रणालीको मंगलबार मेयर रेनु दाहाल, उपमेयर चित्रसेन अधिकारी, वडाअध्यक्षलगायतको उपस्थितिमा पहिलोपटक सुरूवात गरिएको हो। अनलाइनमार्फत घरमै बसेर कर बुझाउन सकिने भएपछि स्थानीयले महानगरपालिकासम्म धाउनुपर्ने झन्झटको अन्त्य भएको महानगरपालिकाले जनाएको छ। ‘पहिलेजस्तो लाइन लागेर बस्नु परेन,’ महानगरपालिकाका प्रमुख प्रशासकीय अधिकृत रामबन्धु सुवेदीले भने, ‘अनलाइनमार्फत कर बुझाउँदा कसैले अनियमितता गरेको होला भनेर शंका गर्नु पनि परेन।’
डिजिटलरूपमै तथ्यांक सुरक्षित रहने भएपछि कागजी झन्झट बोकेर हिँड्नु नपर्ने उनको भनाइ छ। ‘सेवाग्राहीलाई फाइल बोकेर दायाँबायाँ कुद्न पनि परेन,’ उनले भने, ‘अनलाइन कर प्रणाली लागू भएपछि समयको बचत पनि भयो। त्यसैले यो प्रणाली ज्यादै छोटो, छरितो र सजिलो प्रणाली हो।’
भरतपुर महानगरलाई डिजिटल प्रणलीमा लैजाने प्रयास गरिएको मेयर रेनु दाहालले जानकारी दिइन्। राजस्वबाट सुरू गरेर महानगरबाट पाउने सबै सेवालाई ‘डिजिटलाइजेसन’ बनाउने लक्ष्य लिइएको उनले बताइन्। नागरिकलाई सेवामा थप सहज बनाउनका लागि डिजिटल नागरिक बडापत्रको लागि छुट्टै घरसमेत निर्माण गरेर सेवा थालेको उनले बताइन्। ‘डिजिटल नागरिक बडापत्रबाट आम सेवाग्राहीले कुन शीर्षकमा कति शुल्क लाग्छ भन्ने विषयमा पूर्ण जानकारी पाउनेछन्,’ उनले भनिन्, ‘उक्त सेवाको लागि पनि सेवाग्राही फाइल बोकेर दौडिनुपर्दैन। सबै कर्मचारीबाटै सुविधा पाइने व्यवस्था मिलाएका छौँ।’
महानगरपालिकाका लेख प्रमुख जगन्नाथ अर्यालका अनुसार साउन १ गतेबाट लेखा प्रणालीसमेत डिजिटल माध्यमबाटै सुरू गर्ने तयारी भइरहेको छ। ‘त्यसपछि महानगरले डिजिटल माध्यमबाट सेवा दिन सकिने सबै क्षेत्रमा डिजिटल प्रणाली लागू गर्दै लैजाने लक्ष्य लिएको छ,’ उनले भने।