भरतपुर । यातायात व्यवस्था सेवा कार्यालय चितवनले असारभित्रै सवारीसाधनको लाइसेन्सका लागि ट्रायल लिने गरी कामलाई अगाडि बढाएको छ । सबै प्रक्रिया पूरा गरेर ढिलोमा असार अन्तिमबाट सवारी लाइसेन्सको ट्रायल सुरू गर्ने कार्यालयको योजना छ ।

यसअघि जेठभित्रै ट्रायल सुरू गर्ने भनिएकामा ट्रायल सेन्टरहरुको प्राविधिक मूल्याङ्कन गर्ने काम लम्बिँदा ढिलो भएको यातायात व्यवस्था सेवा कार्यालयका प्रमुख विनोद पौडेलले बताए । अहिले ट्रायल सेन्टरहरुको प्राविधिक मूल्याङ्कन गर्ने काम भइरहेको छ ।

कार्यालयको आफ्नै ट्रायल लिने ठाउँ छैन । निजी ट्रायल सेन्टर छनोटका लागि कार्यालयले वैशाख २ गते १५ दिने सूचना निकालेर प्रस्ताव आह्वान गरेको थियो । निर्धारित समयभित्र छवटा ट्रायल सेन्टरले प्रस्ताव पेश गरेका थिए । प्रस्ताव पेश गर्नेमा एक्सिस ड्राइभिङ, महालक्ष्मी ट्रायल सेन्टर, चितवन ड्राइभिङ स्कुल, सदगुरू ड्राइभिङ, गरिमा ड्राइभिङ इन्स्टिच्युट र त्रिवेणी ड्राइभिङ सेन्टर रहेका छन् ।

प्रस्ताव पेश गर्नेमध्येको चितवन ड्राइभिङले ट्रायल लिने ठाउँको नापजाँच गर्न नदिँदा प्राविधिक मूल्याङ्कनको काममा ढिलाइ भएको पौडेलले बताए । ‘नापजाँच गर्न नदिनुको कारण के हो ? नापजाँचका लागि कुर्नुपर्ने भए अब लिखित कारणसहित पत्रको माग गर्छाैं’, उनले भने, ‘कारण खुलाएर कुनै पत्र नआए त्यसको प्रस्ताव रद्द गरेर बाँकी मूल्याङ्कन कार्य गर्छाैं ।’
अबको एक हप्ताभित्र प्रस्ताव पेश भएका सबै ट्रायल सेन्टरको प्राविधिक मूल्याङ्कन सकेर आर्थिक मूल्याङ्कनका लागि प्रस्ताव आह्वान गर्ने उनले बताए । ‘प्राविधिक मूल्याङ्कन छनोट सकेपछि आर्थिक मूल्याङ्कन प्रस्ताव आह्वान गर्छाैं । जसले कम शुल्कमा सुविधा दिन्छु भन्छ उही प्रस्तावक छनोटमा पर्छ’, उनले भने, ‘टेक्निकल मूल्याङ्कन छनोटमा परेका मात्र आर्थिक मूल्याङ्कन छनोटमा सहभागी हुन पाउँछन् ।’

आर्थिक मूल्याङ्कनमा छनोटमा परेको ट्रायल सेन्टरको नाममा कार्यालयले आशयको सूचना जारी गर्छ । त्यसपछि सम्झौताको लागि १५ दिने सूचना निकाल्छ । यसबीचमा ट्रायलका लागि कोटा उपलब्ध गराइदिन कार्यालयले यातायात व्यवस्था विभागमा पत्राचार गर्छ । ट्रायल सेवा सञ्चालनका लागि कार्यालयमा सिस्टम तयारी अवस्थामा छ ।

कोटा उपलब्ध भएपछि अनलाइन प्रणालीबाट सवारी लाइसेन्सका लागि आवदेन दिन सकिने पौडेल बताउँछन् । ‘प्रक्रिया पूरा गर्ने क्रममा कुनै पनि मुद्दा परेन भने ढिलोमा असार अन्तिमबाट ट्रायल लिन सुरू गर्छाैं’, उनले भने ।
सुरूमा ‘क’, ‘ख’ र ‘ग’ वर्गको सवारीसाधनको ट्रायल लिइने उनले बताए । ‘क’ वर्गमा मोटरसाइकल, स्कुटर, मोपेड, ‘ख’ वर्गमा चार र तीनपाङ्ग्रे साना सवारीसाधन र ‘ग’ वर्गमा हेभी र मझौला आकारका सवारीसाधन पर्छन् ।

नवीकरण गरिएका लाइसेन्स आइपुगे
नवीकरण गरिएको सवारीसाधनका लाइसेन्स यातायात कार्यालयमा आइपुगेका छन् । नवीकरणका लागि निवेदन दिएका १९ सय ८२ जनाको लाइसेन्स आइपुगेको पौडेलले बताए । चितवनमा २०७८ मंसिर १२ गतेदेखि लाइसेन्स नवीकरणको काम सुरू भएको हो ।

हालसम्म २४ सय ९४ जनाले लाइसेन्स नवीकरणका लागि निवेदन दिएको उनले जानकारी दिए । भवन भाडामा लिएर सञ्चालन भइरहेको यातायात कार्यालय आगामी साउन १ गतेदेखि जिल्ला समन्वय समितिको गेष्ट हाउस भवनमा सर्दैछ ।