एमाले महासचिव शंकर पोखरेलले आगामी कात्तिक मंसिरमा हुने प्रतिनिधि र प्रदेशसभा निर्वाचनमा एमालेले तालमेल गर्नसक्ने भएपनि गठबन्धन नगर्ने बताएका छन् । एमाले गठबन्धन गर्ने पक्षमा छैन, एक्लै चुनाव लड्छ । चुनावी तालमेलसम्म भने गर्नसक्छ’, महासचिव पोखरेलले भने, ‘निर्वाचन मिति घोषणा भएपछि कोसँग तालमेल गर्ने भन्ने प्रस्ट हुन्छ ।’ महासचिव पोखरेलले वर्तमान सत्ता गठबन्धनमा रहेका दलहरुले केपी ओली र एमालेलाई कमजोर बनाउने घोषित नीति नै लिएकाले ती दलहरूसँग तालमेलको सम्भावना नदेखिएको बताए ।
‘सत्ता गठबन्धनमा रहेका दलहरु एमाले र केपी ओलीलाई जसरी पनि कमजोर बनाउने घोषित नीतिमा छन् । त्यस्तो अवस्थामा तालमेल कसरी हुनसक्छ र महासचिव पोखरेलको प्रश्न छ । अघिल्लो स्थानीय तह निर्वाचनमा ७५३ स्थानीय तहमध्ये २९२ पालिका जितेको एमालेले २०७९ को निर्वाचनमा २०५ पालिका जितेको छ । तर, एमालेले पालिकाको संख्या घटेपनि लोकप्रिय मत नघटेको दावी गरेको छ । पार्टी निर्वाचन विभागमार्फत स्थानीय तह निर्वाचन नतिजाको मिहिन समीक्षा गरिरहेको एमालेले सिट संख्या घटे पनि जनमत नघटेको विश्लेषण गर्दै आएको छ ।
एमाले नेताहरुका अनुसार जेठ २९ अघि कार्यालय बैठक राखेर उक्त बैठकले सचिवालय र स्थायी कमिटी बैठकको मिति तय गर्नेछ । सो बैठकमा सम्पन्न निर्वाचनको समिक्षा गर्दै आगामी निर्वाचनमा अपनाउनुपर्ने रणनीति तय गर्ने एमाले नेताहरुको भनाइ छ । नेकपा एमालेले आगामी असार २ र ३ गते पार्टीका तर्फबाट स्थानीय तहमा निर्वाचित जनप्रतिनिधिहरूलाई काठमाडौं बोलाएर प्रशिक्षण दिँदैछ ।
