भरतपुर । शनिबार बेलुकी ९ः१० बजेको समयमा भरतपुर महानगरपालिका वडा नं–१५ स्थित रामपुर कृषि क्याम्पसअगाडि कारको ठक्करबाट मोटरसाइकलमा सवार सेनाका एक अमलदारको मृत्यु भएको छ ।
भरतपुरबाट चनौलीतर्फ आउँदै गरेको ग२ च ९०६२ नम्बरको कारले चनौलीबाट चौबिसकोठीतर्फ जाँदै गरेको ना३३प १४५५ नम्बरको मोटरसाइकललाई ठक्कर दिँदा तनहुँको देउराली–७ घर भई हाल कालीबहादुर गण भरतपुरमा कार्यरत नेपाली सेनाको अमलदार ३३ वर्षीय सुरज गुरूङको मृत्यु भएको हो ।
दुर्घटनामा गम्भीर घाइते भएका गुरूङको चितवन मेडिकल कलेज भरतपुरमा साउन १ गते बिहान १ः३५ बजे उपचारको क्रममा मृत्यु भएको प्रहरीले जनाएको छ ।
कार चालक राजकुमार गुरूङ, कार र मोटरसाइकल प्रहरीले नियन्त्रणमा लिई अन्य अनुसन्धान भइरहेको प्रहरी प्रवक्ता डिएसपी नरहरि अधिकारीले जानकारी दिए ।
