भरतपुर । २०७८ सालको चितवनको एसईई परीक्षाको नतिजा कमजोर आएको छ । चितवनका शैक्षिक निकायका प्रतिनिधिहरु कोरोनाको कहरका कारण नतिजा केही कमजोर आएको बताउँछन् ।
यसपटक चितवनमा जम्मा दुई जनाले मात्र चार जिपिए ल्याए । २०७७ सालमा चार जिपिए ल्याउने चितवनमा २४९ विद्यार्थी थिए । २०७६ सालमा २२९ जनाले चार जिपिए ल्याएका थिए । २०७५ सालमा चितवनमा ११ जनाले चार जिपिए ल्याएका थिए ।
‘चार जिपिएलाई हेर्ने हो भने अहिलेको नतिजा केही कमजोर देखियो, तर समग्रमा हेर्दा नतिजा सन्तोषजनक छ’, शिक्षा विकास समन्वय इकाइका प्रमुख भूमिलाल सुवेदीले भने, ‘कोरोनाको कहरका कारण नतिजा सामान्य कमजोर देखिएको छ, यसपटक त बेञ्चमा बसेर परीक्षा दिनु नै ठूलो कुरो थियो, कोरोनाको कहरमा धन्न विद्यार्थीले परीक्षा दिए, चार जिपिए ल्याउने विद्यार्थीको संख्या घटे पनि अन्य माथिल्लो ग्रेडमा भने विद्यार्थी नतिजा राम्रो छ ।’
२०७६ र ७७ मा चार जिपिए ल्याउने विद्यार्थीको संख्या अत्यधिक छ । कोरोनाको कहरले यी दुई साल विद्यालय आफैँले आन्तरिक मूल्याङ्कन गरेर अङ्कभार परीक्षा बोर्डमा पठाए । आन्तरिक मूल्याङ्कनका कारण विद्यार्थीको क्षमताभन्दा बढी अङ्क दिएका कारण २०७६ र ७७ मा सालमा चार जिपिए ल्याउने विद्यार्थीको संख्या धेरै देखिएको कतिपय विद्यालयका प्रधानाध्यापकले समेत स्वीकारेका छन् ।
यसपटकको एसइईमा चितवनमा ३.६ देखि ३.९ सम्म जिपिए ल्याउने विद्याथीको संख्या ५५० भयो । गत वर्ष २ हजार २९८ जनाले यति जिपिए ल्याएका थिए । यसपटक ३.२ देखि ३.६ जिपिएसम्म ल्याउने विद्यार्थीको संख्या एक हजार २९२ छ । गत वर्ष यति जिपिए ल्याउने विद्यार्थीको संख्या २ हजार ८५९ थियो ।
यसपटक २ हजार १४१ जनाले २.८ देखि ३.२ जिपिएसम्म ल्याए । गत वर्ष ३ हजार ५३० जनाले यति जिपिए ल्याएका थिए ।
यसवर्ष दुई हजार ४२५ जनाले २.४ देखि २.८ जिपिए ल्याएका छन् । यस्तै, यसवर्ष दुई हजार ६३९ जनाले २.० देखि २.४ जिपिए ल्याए । यस्तै, यसवर्ष दुई हजार २७८ जनाले १.६ देखि २.० जिपिए, ६४५ जनाले १.२ देखि १.६ जिपिए र १४ जनाले ०.८ देखि १.२ जिपिए ल्याएको शिक्षा विकास समन्वय इकाइले जनाएको छ ।
भरतपुर महानगरका नगर शिक्षा अधिकारी महेन्द्र पौडेलले यसपटक कोरोनाको कहरका कारणले कमजोर नतिजा आएको स्वीकार्छन् । उनी भन्छन्, ‘कोरोना कहर त २०७७ सालमा पनि थियो, त्यतिबेला आन्तरिक मूल्याङ्कनका कारण केही नतिजा राम्रो आयो, अहिले कोरोना कहरमै परीक्षा बोर्डले परीक्षा लियो ।
आन्तरिक मूल्याङ्कन भएन, जसका कारण विगतका वर्षको तुलनामा यसपटक थोरै नतिजा खस्केको देखियो ।’ उनले शैक्षिक गुणस्तर सुधारमा भरतपुर महानगर लागिरहेको बताए ।
उनले भने, ‘छात्रवृत्ति वितरणदेखि स्कुल बससम्म वितरण भइरहेका छन्, शिक्षकदेखि प्रअसम्म गुणस्तर सुधारमा लागिरहेका छन्, आशा गरौँ आगामी दिनमा नतिजा केही बढ्नेछ ।’ यसपटक चितवन जिल्लामा २३५ विद्यालयका १२ हजार ३२ जना विद्यार्थीले एसइई परीक्षा दिएका थिए ।
सामुदायिकतर्फ नारायणी नमुना पहिलो
चितवनमा सामुदायिक मावितर्फ नारायणी नमुना मावि पहिलो भएको छ । विद्यार्थी संख्याको हिसाबले र जिपिएको हिसाबले नारायणी नमुना मावि पहिलो भएको छ ।
सामुदायिकतर्फ भरतपुर–१० मा रहेको नारायणी नमुना मावि चितवन जिल्लाकै पहिलो भएको छ । विगत एक दशकदेखि नारायणी मावि जिल्लाको पहिलो मात्र होइन देशकै उत्कृष्ट सातभित्र परिरहेको छ । यसपटक नारायणीका प्रशान्त अधिकारीले चार जिपिए ल्याउन सफल भएका छन् ।
विद्यालयका प्रधानाध्यापक पूर्णप्रसाद दवाडीका अनुसार ३८२ जनाले एसइई दिएकामा एक जनाको ४ जिपिए, ३.६ देखि ३.९ सम्म ९३ जना, ३.२ देखि ३.६ सम्म १०९ जना, २.८ देखि ३.६ सम्म ८४ जना, २.४ देखि ३.६ जिपिए ५० जनाले ल्याए ।
