भरतपुर । भरतपुर आँखा अस्पतालले बिमा स्वास्थ्य कार्यक्रमलाई पुनः सञ्चालन गरेको छ । बिरामीको तर्फबाट धेरै नै दबाब आएपछि आपूmहरुले सेवा सुरू गरेको भरतपुर आँखा अस्पतालका सूचना अधिकारी रमेश घिमिरेले जानकारी दिए ।

साउन १ गतेबाट लागू हुने गरी आँखा उपचारमा बिमा सुविधा कटौती गरिएकोमा शुक्रबारबाट आंशिक सञ्चालनमा ल्याइएको र आइतबारबाट पूर्णरुपमा सञ्चालनमा ल्याउने उनले बताए । उनले सरकारले बिमा दाबी भुक्तानी नगरेका कारण बाध्य भएर बन्द गरिएको प्रतिक्रिया दिएका थिए । तर, बिमा बोर्डसँगको कुराकानीको क्रममा केही दिनमा दाबी गरिएको केही रकम दिने आश्वासन पाएकाले आफूहरुले पुनः सञ्चालन गरेको घिमिरेको भनाइ छ ।

नेत्रज्योति संघबाट सञ्चालित यस आँखा अस्पताल सामुदायिक प्रकृतिको अस्पताल हो । सरकारले बजेट भाषणमा अब सरकारी र सामुदायिक अस्पतालले मात्र बिमा सुविधा दिन पाउने भने पनि यस अस्पतालले बक्यौता धेरै भएको भन्दै सेवा रोकेको थियो । ‘अझै हामीले पाँच करोड रूपैयाँ बिमा दाबी पाउनु छ’, सूचना अधिकारी घिमिरेले भने, ‘बिमा बोर्डमा रेकर्ड पुष्टि गर्न बाँकी रहेकाले आउन ढिलाइ भएको बुझिएको छ ।’ हरेक दिन ८ बजेर ३० मिनेटदेखि १२ बजेसम्म बिमाका बिरामीलक्षित सेवा दिने तयारी रहेको अस्पतालले जनाएको छ ।

बिमा कार्यक्रममा समावेश भए पनि सुविधा नपाउँदा यसबीचमा बिरामीले पैसा तिरेर उपचार लिएका छन् । बिरामी सेवा पाउनबाट वञ्चित बनेका छन् । राप्ती–८ की राममाया पाठकले शुक्रबार मात्र आँखाको अप्रेसन गरिन् । बिमा तत्काल नखुल्ने भएपछि आफ्नै खर्चमा उनले उपचार गराइन् । आँखा नै बन्द हुने अवस्था आएपछि आकस्मिकरुपमा अप्रेसन गरिएको उनले बताइन् । निजी खर्च जुटाउन नसक्ने अप्रेसनका लागि आएका बिरामी अस्पतालबाट फिर्ता भएका छन् ।

अस्पतालमा सेवा लिनेमध्ये ६० प्रतिशत बिरामी बिमा कार्यक्रमको रहेका छन् । जम्मा अप्रेसनको ८० प्रतिशत अपे्रसन सेवा बिमाका बिरामीले लिएको अस्पतालले जनाएको छ । अस्पतालको मासिक खर्च नै लगभग ४५ लाखसम्म हुने गरेकोमा सबै बिमाको पैसामा निर्भर रहेको उनले बताए । बिमाको दाबी रकम नआउने हो भने साउन महिनाबाट कर्मचारीले सेवासुविधा नपाउने घिमिरेले बताए ।

यसअघि साउन १ गतेबाटै लागू हुने गरी चितवन मेडिकल कलेजले पनि बिमा कार्यक्रम स्थगित गरेको छ । यस अस्पतालले बिमा कार्यक्रम निरन्तरताबारे बिमा बोर्डसँग जवाफ मागेको छ । तर, बोर्डले जवाफ पठाएको छैन । त्यस कारण सेवा रोकिरहने वा सुचारू गर्ने भन्ने अन्योल रहेको अस्पताल प्रशासनले जनाएको छ ।

बिमा बोर्डले भने एकतर्फी सम्झौता भङ्ग गर्ने वा पुनः चालू गर्ने कुरा विधिसम्मत नभएको बताएको छ । बोर्डका कार्यकारी निर्देशक डा. दामोदर बसौलाले भने, ‘अस्पतालले एकतर्फी भङ्ग गर्नु र पुनः चल्यौँ भन्नु विधिसम्मत होइन ।’ सरकारले बजेटमार्फत सामुदायिक र सरकारी अस्पतालले मात्र बिमा कार्यक्रम चलाउने भने पनि त्यसको आधिकारिक निर्णय नभइसकेकाले बिमा कार्यक्रम रोक्न नहुने उनले बताए ।