चितवन,१८ श्रावण : सामाजिक संस्था सोच परिवर्तन नेपालले कालिका नगरपालिका ८ स्थित गैरीबारी झरना सरसफाइ गरेको छ । विभिन्न समयमा विविध सामाजिक कार्य गर्दै आएको सोच परिवर्तन नेपाल नामक संस्थाले नाग पञ्चमीको अवसर पारेर गैरीबारी झरना सरसफाइ गरेको हो ।
सोच परिवर्तन नेपालको आयोजना एवम् कालिका नगरपालिका वडा नम्बर ८ को सहकार्यमा सरसफाइ कार्यक्रम सम्पन्न भएको हो । कार्यक्रमका प्रमुख अतिथी एवम् कालिका ८ का जनप्रतिनिधि रामचन्द्र अधिकारीले आफ्नो वडामा यस किसिमको सामाजिक कार्य सञ्चालन गरेकोमा धन्यवाद दिदै फेसबुकको अभियानले मात्रै परिवर्तन नहुने भन्दै त्यसमा जोड नदिन युवाहरुलाइ आग्रह गर्नुभयो।
स्थानीय बासिन्दा र होटल व्यवसायीहरुले सरसफाइमा ध्यान नदिएको भन्दै अधिकारीले गुनासो समेत व्यक्त गर्नुभयो । झरनाको प्रचार प्रसार गरेर आन्तरिक र बाह्रय पर्यटक भित्र्याउन सकिनेमा आफू आशावादी रहेको बताउदै वडामा हुने यस किसिमको हरेक कार्यमा सक्दो सहयोग गर्ने पनि जनप्रतिनिधि अधिकारीले प्रतिबद्धता व्यक्त गर्नुभयो।
आज गरिएको सरसफाइमा फोहर व्यवस्थापन गर्न कठिन भएको संस्थाका अध्यक्ष शिवराज कंडेलले बताउनुभयो। करिब २ बोरा भन्दा बढी रक्सीको बोत्तल साथै ३ बोरा भन्दा बढी जङ्क फुडका खोलहरु बटुलेको बताउदै यस विषयमा स्थानीय सरकारलाइ ध्यान दिन समेत कंडेलको आग्रह रहेको छ।
सरसफाइ कार्यक्रममा सोच परिवर्तन नेपाल कार्यसमिति र सहयोगि समिति आदर्श मावी दिव्यनगरका २० भन्दा बढी सक्रिय सदस्य साथै जुटपानी ईलाका प्रहरी कार्यलयका प्रमुख नवराज घिमिरे, समाजसेवी मातृका गुरुङ लगायत अतिथिहरुको उपस्थिति रहेको थियो ।
