नेकपा माओवादी केन्द्रका केन्द्रीय कार्यालय इन्चार्ज एवं स्थायी समिति सदस्य वर्षमान पुनले एमाले अध्यक्ष केपी ओलीले विगतका गल्ती स्वीकार गरे चुनावी तालमेल वा फेरि पार्टी एकता हुन सक्ने बताएका छन्।

विगतमा एमालेले वामपन्थी रुझान देखाएकाले एकता भएको र दक्षिणपन्थी रुझान देखिएपछि अलग भएको भन्दै उनले गल्तीको महसुस गरे एकताको ढोका खुल्ने बताए।

सहकार्यका लागि प्रतिनिधिसभा विघटनका विषयमा एमालेले गल्ती स्वीकार गर्नुपर्ने सर्त पुनले अघि सारे।

‘एमाले अध्यक्ष र मूल नेतृत्वले हिजोका गल्तीहरूको महसुस गर्‍याे भने विस्तारै मोर्चाबन्दी हुन्छ, गठबन्धन हुन्छ’, कार्यक्रम टफटकका लागि पत्रकार दिलभुषण पाठकसँग कुरा गर्दै पुनले भने, ‘गल्तीको महसुस गर्ने बित्तिकै रातारात पार्टी एकता त नहोला, तर सहकार्यको ढोका खुल्छ ।’

पुनले एमाले नेताहरूसँग आफूहरूको संवाद भइरहेको समेत खुलासा गरे। दिर्घकालीन रूपमै कांग्रेससँग सहकार्यको नीतिमा आफूहरू नरहेको स्पष्ट गर्दै उनले वामपन्थी र विचार मिल्ने शक्तिहरूसँग सहकार्य र एकताको प्रक्रियामा अघि बढ्ने बताए।

‘हिजो हामीले एउटै पार्टी बनायौँ। पहिलो अध्यक्ष र प्रधानमन्त्री ओलीजी हुनुहुन्थ्यो। उहाँले पार्टी र सरकारलाई ठीक ढंगले ड्राइभ गर्न सक्नुभएन। न सरकारको पर्फमेन्स राम्रो भयो। ६ वटा प्रदेशमा एब्सुलेट बहुमत थियो। संघमा दुई तिहाइको सरकार थियो। विकासको जग, सुशासनको जग बसाल्नुपर्ने थियो, त्यो भएन । पार्टी पनि पारदर्शी ढंगले सामूहिकताका आधारमा चलाउनुपर्नेमा त्यो भएन’, उनले भने, ‘फेरि यी कुराहरू करेक्सन भए भने एकता पनि हुन्छ, तालमेल पनि हुन्छ गठबन्धन पनि हुन्छ। कुनै आश्चर्यको कुरा होइन। म वामपन्थीहरू मिल्नुपर्छ भन्नेमा हो।’

पुनले संविधान र व्यवस्था बचाउन कांग्रेससँग गठबन्धन गरेको चर्चा गर्दै तत्काल गठबन्धन टुटाउन नखोजेको स्पष्ट गरे। आफू ओली प्रधानमन्त्री हुँदा मन्त्रीका रूपमा रहेको र संविधान विघटन गरेकै दिन राजीनामा दिएको स्मरण गरे। मन्त्री पद नै छाडेर कांग्रेससँगको गठबन्धन निर्माणमा भूमिका खेलेकाले वर्तमान सत्ता गठबन्धसँग आफ्नो लगाव रहेको उल्लेख गरे।

यद्यपि कांग्रेस एक्लै चुनावमा जाँदा यसअघिको २३ सिटबाट खुम्चिने उनले बताए। अघिल्लो निर्वाचनबाट माओवादी प्रत्यक्षतर्फ ३७ सिटसहित दोस्राे दल बनेको कुरालाई कांग्रेसले हेक्का राख्नुपर्ने उल्लेख गरे। माओवादीसँग नमिले २३ सिटबाट तल झर्ने यथार्थलाई बुझ्न कांग्रेस नेतृत्वलाई चेतावनी दिए।

‘हाम्रो ३७ सिट थियो। अहिले केही बढ्छ। कांग्रेस २३ सिटमा थियो, अहिले बढ्छ’, उनले भने, ‘फेरि वामशक्ति मिल्दा कांग्रेस ५ वा ७ सिटमा जान्छ। कांग्रेस र वाम-लोकतान्त्रिक शक्ति मिल्दा एमाले ९ सिटमा झर्छ, यो सबैले भनिराखेको कुरा हो।’

नेपालमा परम्परागत शक्तिको नेतृत्व कांग्रेसले र प्रगतिशिल वामपन्थी शक्तिको नेतृत्व माओवादी केन्द्रले गर्ने भन्दै उनले तत्काल एमालेसँग सम्भावना नभए माओवादी, एकीकृत समाजवादी, राष्ट्रिय जनमोर्चा, बाबुराम भट्टराई, वामदेव गौतम र उपेन्द्र यादवसम्म एउटै मोर्चामा सहभागी भएर निर्वाचनमा जाने सम्भावना रहेको औंल्याए।

वाम-लोकतान्त्रिक गठबन्धन कांग्रेस-एमाले हाराहारीको शक्ति बन्ने र मुलुकको राजनीतिमा त्रिपक्षीय शक्ति सन्तुलन देखा पर्ने दाबी उनको थियो। देशमा कांग्रेसले परम्परावादी शक्ति र आफूहरूले प्रगतिशील वामपन्थी शक्तिको अगुवाई गरिरहेको भन्दै पुनले एमाले कहिले वामजस्तो र कहिले परम्परावादी शक्ति जस्तो देखिँदै आएको टिप्पणी गरे।

‘एमाले संक्रमणमा छ, उसले आफ्नो पोजिसन स्पष्ट गर्नुपर्छ। पोजिसन स्पष्ट गर्दै जाँदा वाम-समाजवादी गठबन्धनमा पनि आउन सक्छ’, उनले भने।

समाचार श्रोत : देशसंचार