चितवन – नेपाल नागरिक उड्डयन प्राधिकरण (क्यान)ले हवाई यात्रुको चाप बढी हुने आन्तरिक विमानस्थलमा सुविधासम्पन्न टर्मिनल भवन बनाउने भएको छ । आर्थिक वर्ष ०७९/८० को बजेट तथा कार्यक्रम सार्वजनिक गर्दै क्यानले ६ वटा आन्तरिक र दुईवटा अन्तर्राष्ट्रिय विमानस्थलमा नयाँ टर्मिनल भवन यसै वर्ष निर्माण सुरु गर्ने घोषणा गरेको हो ।
आन्तरिक विमानस्थलहरू विराटनगर, भरतपुर, नेपालगन्ज, महेन्द्रनगर, रामेछाप र जुम्लालाई स्तरोन्नति गरिने तथा त्रिभुवन र गौतम बुद्ध अन्तर्राष्ट्रिय विमानस्थलमा दोस्रो टर्मिनल भवन निर्माण प्रक्रिया सुरु गर्ने क्यानका महानिर्देशक प्रदीप अधिकारीले बताए । क्यानले बहुवर्षीय ठेक्का प्रक्रियाबाट आन्तरिक स्रोतबाटै नयाँ टर्मिनल भवन बनाउने उद्घोष गरेको हो ।
क्यानका अनुसार चितवनको भरतपुर विमानस्थलमा सवा अर्ब लगानीमा सात हजार सात सय ४९ वर्गमिटरको नयाँ टर्मिनल भवन बनाइनेछ । यसका लागि प्राधिकरणले आर्थिक वर्ष २०७९/८० मा १९ करोड ४२ लाख रुपैयाँ बजेट विनियोजन गरेको छ ।
भरतपुर विमानस्थलमा हाल सुरुवाती चरणकै टर्मिनल भवन रहेको छ । पुरानो र साँघुरो भएकाले नयाँ टर्मिनल भवन निर्माणको आवाज उठ्दै आएको थियो । नयाँ टर्मिनल भवनसँगै धावनमार्ग पनि विस्तार गरिनेछ । विमानस्थलमा हाल एक हजार १५८ मिटर लामो धावन मार्ग छ । यस धावन मार्गलाई पनि बढाएर एक हजार पाँच मिटरको बनाइनेछ ।
भरतपुर विमानस्थल विस्तारका लागि नागरिक उड्डयन प्राधिकरणले एक दशकअघि देखि प्रयास गरिरहेको छ । अहिले एटीआर ४२ सम्मको जहाज अवतरण हुनसक्ने भरतपुर विमानस्थललाई विस्तार गरी एटीआर ७२ सम्मको जहाज अवतरण हुनसक्ने गरी विस्तार गर्ने प्राधिकरणको योजना छ। तर, विस्तारका लागि आवश्यक जग्गा नेपाली सेनाले प्रयोग गरिरहेको छ। प्राधिकरण र सेनाबीच सो जग्गा प्रदान गर्ने सहमति भएको प्राधिकरणका महानिर्देशक अधिकारीले बताए।
विमानस्थल विस्तारमा विगतमा नेपाल ट्रष्टको जग्गामा नेपाली सेनाको घोडा प्रजजन केन्द्र सार्ने र सेनाले घोडा प्रजजन केन्द्रका लागि प्रयोग गरेको जग्गा विमानस्थल विस्तारमा प्रयोग गर्ने विषय अगाडि आएको थियो। नेपाल ट्रष्टको जग्गा प्रयोगलगायत विमानस्थलमा रहेको अवरोधका विषयमा विगतमा पनि अध्ययन भएको थियो। तर नेपाल ट्रष्टको जग्गा प्रयोगको विषयमा सहमति हुन सकेको थिएन।
पुनः अहिले प्राधिकरण र सेनाबीच विमानस्थल विस्तारका लागि आवश्यक जग्गा सेनाले सहयोग गर्ने र प्राधिकरणले पनि विपद व्यवस्थापन लगायतका लागि हेलिप्याड लगायतको संरचना बनाई दिनेगरी सहमति भएको हो। सहमतिसँगै प्राधिकरण र सेनाका प्रतिनिधिसहितको कार्यादल गठन भएको थियो। विमानस्थल विस्तारका लागि आवश्यक तयारीका साथ काम गर्ने गरी कार्यदलले काम सुरु गरेको प्राधिकरण महानिर्देशक अधिकारीले बताए।
भतपुर विमानस्थल विस्तारमा नेकपा माओवादी केन्द्रका अध्यक्ष पुष्पकमल दाहाल प्रचण्डले समेत चासो दिँदै आएका छन्। भरतपुर महानगरपालिकाले समेत विमानस्थल विस्तारमा चासो दिँदै पूर्ण सहयोग गर्ने बताउँदै आएको छ।