उता निर्वाचनको मिति घोषणा भएपछि सत्ता गठबन्धन प्रतिनिधिसभा र प्रदेशसभा निर्वाचनमा सिट बाँडफाँडमा केन्द्रित भएका छन्। आमचुनावको मिति घोषणा गरेको भोलिपल्ट गठबन्धनका नेताहरूको बैठक प्रधानमन्त्री शेरबहादुर देउवाको सरकारी निवास बालुवाटारमा बैठक बसिरहेको छ।

बैठकमा सत्तारूढ दलका दोस्रो तहका नेताहरू पनि सहभागी छन्। बैठकमा चुनावी तालमेलका साथै लोकतान्त्रिक समाजवादी पार्टीलाई सरकारमा ल्याउने विषयमा छलफल हुने स्रोतले बतायो।

यसअघि सरकारको नेतृत्व गरिरहेको कांग्रेसले लोसपालाई सरकारमा ल्याउने प्रस्ताव गरेको थियो। गठबन्धनमा रहेको जनता समाजवादी पार्टीका अध्यक्ष उपेन्द्र यादवले लोसपालाई सरकारमा ल्याउने विषयमा असहमति जनाएको बताइएको थियो।

कांग्रेसले आगामी निर्वाचनमा अधिकतम सिट आफूसँग राख्दै तालमेल गर्ने निर्णय गरिसकेको छ। कांग्रेसले प्रत्यक्षतर्फ ९० सिट आफूले राखने र बाँकी ७५ सिट अन्य सहयोगी घटकलाई छोड्ने निर्णय गरेको छ। तर कांग्रेसको यो निर्णयप्रति गठबन्धनमा सहभागी अन्य सशंकित देखिएका छन्। सोही विषयमा छलफल गर्न अहिले पाँच दलीय गठबन्धनको बैठक चलिरहेको छ ।