निराज रानाभाट , भरतपुर , चितवन : चितवन जिल्लाको भरतपुरमा साउन २६ गते , बिहीबार ( अाज ) देखि ` ३ महिने घुम्ती खुल्ला रक्तदान कार्यक्रम ´ शुरु हुँदै छ ।

अन्तर्राष्ट्रिय युवा दिवसको अवसरमा भरतपुर महानगरले ` ३ महिने घुम्ती खुल्ला रक्तदान ´ गर्ने भएको छ । अन्तर्राष्ट्रिय युवा दिवस – २०२२ लाई लक्षित गर्दै महानगरले सामाजिक सस्था ` ब्लड डोनर्स सोसाइटी नेपाल ´ सँग सहकार्य गरि उक्त कार्यक्रम गर्न लागेको हो ।

कार्यक्रम भरतपुर महानगरपालिकाबाट मिति वि.सं. २०७९ साल साउन २६ गते शुरु भई सबै वडाहरुका पायक पर्ने स्थानमा कार्यक्रम हुने कुरा भरतपुर महानगर युवा सन्जालका सम्योजक सन्देश वाग्लेले बताए ।

मेडिकल सिटीका रुपमा चिनिने चितवनमा रगतको चरम अभाव छ । तुलनात्मक रुपमा दैनिक हुने रक्तदानमा आउने रगत भन्दा खपत दोब्बर जस्तै छ । रक्तसंचार केन्द्रले रगतको मागको दबाब थेग्न नसकेको अवस्था देखिएको छ । विभिन्न संघसंस्थाहरुले आयोजना गरेको कार्यक्रमहरुबाट सन्कलित रगतहरुले जेनतेन धानेको अवस्था छ ।
रगतको अभावलाई मध्यनजर गर्दै भरतपुर महानगरपालिकाले सम्पूर्ण वडामा कार्यक्रम गर्ने गरि ३ महिने घुम्ती रगत संकलन शिविर गर्ने तयारी गरेको हो ।

रगत अभावलाई केही हदसम्म न्यूनीकरण गर्न र रक्तदान बारे समुदायमा जनचेतना जगाउन यस अभियानले ठूलो भूमिका खेल्ने महानगर शैक्षिक प्रशासन महाशाखा प्रमुख महेन्द्र प्रसाद पौडेल बताए । उनले नियम रक्तदाता गर्छन् ।

कार्यक्रमको शुरुवात महानगर प्रमुख रेणु दाहालबाट शुरु हुँदै छ । युवा दिवस लक्षित कार्यक्रममा रक्तदान कार्यक्रम , बृक्षरोपण कार्यक्रम , कारागारमा पुस्तक वितरण , सम्पदा अवलोकन भ्रमण र बुद्धिचाल प्रतियोगिता समेत हुने भएको छ ।