निराज रानाभाट , काठमाडौं : विश्वको ठूलो फिल्म बजार मानिने भारतमा पहिलोपटक नेपाली चलचित्र हिन्दीमा डब भएर प्रदर्शन हुँदै छ । यो इतिहास रच्न लागेको चलचित्र हो , ‘ प्रेमगीत ३ ’ । कोरोना भाइरस महामारीको समयमा निर्माता तथा निर्देशक सन्तोष सेन र अभिनेता प्रदीप खड्काले महिनौं भारतको मुम्बई बसेर चलचित्रको हिन्दी डब गरेका हुन् । अब यो चलचित्र आगामी असोज ०७ गतेबाट नेपाल र भारतमा एकसाथ प्रदर्शनमा आउँदै छ ।

शनिबार चलचित्रको नेपाली र हिन्दी टिजर सार्वजनिक गरियो । नेपाली टिजर आक्रामक भ्यूजका साथ नेपालको ट्रेन्डिङ नम्बर ५ मा छ । १ मिनेट लम्बाईको एक्सन प्याक्ड टिजरलाई दर्शकबाट उम्दा प्रतिक्रिया मिलेको छ भने हिन्दी टिजरले नेपालसँगै भारतमा राम्रो चर्चा बटुलिरहेको छ , तर नेपाली दर्शक र चलचित्रकर्मीले चलचित्रको टिजर नेपालीभन्दा हिन्दी भर्सनमा बढी रुचाएका छन् ।

साउथका प्रायः सुपर स्टारको चलचित्रको हिन्दी डबिङ गरेका कलाकारले आवाज दिएकाले पनि टिजरले दर्शकको ध्यान खिचेको हो । हिन्दी टिजरमा डबिङ आर्टिस्टको डाइलग डेलिभरी र आवाज सुनेपछि नेपाली टिजरमा नेपाली कलाकारको डाइलग डेलिभरी फिक्का लाग्छ । हिन्दी टिजर हेरेपछि नेपाली दर्शकहरुले फिल्मको नेपाली भर्सनभन्दा हिन्दी डब हेर्न बढी रुचि देखाएका छन् ।

निर्माता तथा निर्देशक सेनले भारतसँगै नेपालमा पनि फिल्मको हिन्दी डब रिलिज हुने जानकारी दिए । ‘ दर्शकहरुले हिन्दी टिजर बढी रुचाएको पायौं । साउथ फिल्मको हिन्दी डबमा सुनिरहेको आवाजले गर्दा पनि हुन सक्छ ,’ उनले भने , ‘ हामी फिल्मलाई नेपालमा हिन्दी डबमा पनि रिलिज गर्छौं । सम्भवतः नेपाली भर्सनमा रिलिज भएको १ हप्तापछि हिन्दी डब रिलिज हुन सक्छ । ’

उनी दर्शकहरुले हिन्दी भर्सनको टिजर बढी मन पराउनुको कारण डबिङ आर्टिस्टको आवाज परिचित भएर हुन सक्ने बताउँछन् । ‘ केही वर्षयता हामी साउथ फिल्मबाट प्रभावित छौं । साउथका अधिकांश सुपर स्टारहरुको चलचित्रको हिन्दी डबमा आवाज दिएका कलाकारले नै फिल्ममा डबिङ गरेकाले नेपालीभन्दा हिन्दी टिजर दर्शकलाई मन परेको होला , तर फिल्म हेर्दा त्यस्तो लाग्दैन । ’

सन्तोषले भारतमा टिजरलाई मिलेको प्रतिक्रियाबाट उत्साहित रहेको बताए । बलिउड फिल्मका ट्रेड एनालिस्ट तरण आदर्शले फोन गरेरै टिजरको प्रशंसा गरेको बताउँदै सन्तोषले भने , ‘ पोस्टर र टिजरले भारतमा फिल्मको निकै राम्रो चर्चा पाएको छ । अब हामी भारतमा प्रचारलाई ग्राउन्ड लेभलबाट शुरु गर्दैछौं । भारतमा चलचित्र राम्रो चल्यो भने नेपाली चलचित्रका लागि ठूलो ढोका खुल्ने छ । ’

स्वर्गीय छेतेन गुरुङ र सन्तोष सेनले संयुक्त रुपमा निर्देशन गरेको चलचित्रमा प्रदीप खड्का , अनुभव रेग्मी , मनिष राउत , सम्वृद्धि शाही ठकुरी , सुनिल थापा , सन्तोष सेन , माओत्से गुरुङ , पुस्कर कार्की , प्रेम पुरी , लक्ष्मी वर्देवा , योगिशा खत्रीलगायतको अभिनय रहेको छ । चलचित्र ‘ प्रेमगीत ३ ’ बाट क्रिस्टिना गुरुङले नायिकाको रुपमा डेब्यू गरेकी छन् । चलचित्रलाई राजेश श्रेष्ठले छायांकन गरेका हुन् ।