भक्तपुर । भक्तपुरको सूर्यविनायक नगरपालिका-८ गणेश मन्दिर नजिक गुण्डुबाट गणेश मन्दिरतर्फ आउँदै गरेको बा ३ ख ५०५२ नं को ख्वप कलेज देकोचा भक्तपुरको विद्यार्थी बोक्ने बसको चालकमाथि मंगलबार कुटपिट भएको छ ।

काभ्रे नमोबुद्ध नगरपालिका ५ घर भई हाल भक्तपुर जगाती बस्ने वर्ष २५ को कलेजका बस चालक राजु लामालाई विपरीत दिशातर्फ जादै गरेको बा ५ ख ५४७३ नं को कारमा सवार ४/५ जना पुरुषले गालीगलौज गरी कुटपिट गरेको प्रहरीले जनाएको छ । घटना मंगलबार बिहान साढे १० बजे भएको प्रहरीले जनाएको छ । उनीहरुले निज चालकलाई मार्नेसमेत धाकधम्की दिएको भक्तपुर प्रहरी परिसरले जनाएको छ ।

उक्त कार र सवार व्यक्तिहरु कुटपिटपछि गुण्डुतर्फ फरार भएको भक्तपुर प्रहरी परिसरका एसपी प्रजित केसीले जनाए । फरार उनीहरुलाई कारसहित पक्राउ गरेको र अहिले सोधपुछ कार्य जारी रहेको एसपी केसीले जनाए ।  बस चालकको घाँटीमा भित्री चोट लागेको जनाइएको छ ।