१० पुसको सहमतिअनुसार रास्वपाले गृह मन्त्रालयसहितका मन्त्रालय पाए सरकारमा जान सकारात्मक देखिएको छ । आइतबार प्रधानमन्त्री पुष्पकमल दाहाल ‘प्रचण्ड’ले पनि रास्वपाका सभापति रवि लामिछानेलाई सरकारमा सहभागी हुन प्रस्ताव राखेका थिए ।

त्यसलगत्तै आज बसेको रास्वपाको केन्द्रीय समिति बैठकमा सरकारमा सभागी हुनेबारे सदस्यहरूले आआफ्नो धारणा राखेका छन् । बैठकमा सदस्यहरूबाट मिस्रित सुझाव आएको छ । सरकारलाई समर्थन मात्र गरेर नबस्ने निचोडमा रास्वपा पुगेको छ । सरकारमा सहभागी हुने या प्रतिपक्षीमा बस्ने विकल्पमा रास्वपामा छलफल चलिरहेको छ ।

उपनिर्वाचनअघि नै प्रतिपक्षी बेञ्चमा बस्ने तयारी गरेको रास्वापा प्रधानमन्त्री पचण्डको प्रस्तावपछि सरकारमा जाने मनस्थितिमा पुगेको छ । रास्वपाका प्रवक्ता मुकुल ढकालले सरकारमा जाने या प्रतिपक्षीमा बस्ने निर्णय शुक्रबार गर्ने बताए । ‘केन्द्रीय समिति र संसदीय दलको संयुक्त बैठकबाट सरकारमा जाने या प्रतिपक्षीमा बस्ने निर्णय गर्छौं,’ उनले भने ।

रास्वपाले सरकारमा जाने वा प्रतिपक्षमा बस्ने निर्णय २२ वैशाखमा गर्ने
सरकारमा सहभागी हुन रास्वपाले चार सर्त अगाडि सारिरहेको छ । पहिलो सर्त १० पुसमा भएको सहमतिअनुसार गृहसहितको मन्त्रालय पाउनु पर्ने । दोस्रोमा नीति तथा कार्यक्रम पुनः लेख्नुपर्ने माग छ । तेस्रोमा सरकार स्थिर हुनुपर्ने र चौथोमा सरकारमा सहभागी हुँदा हस्तक्षेप हुन नहुने स्वायत्त भएर काम गर्न दिनुपर्ने सर्त रास्वपाको छ । गृहसँगै रास्वपाले अर्थमा समेत दाबी गरिरहेको छ । अर्थ मन्न्त्रालय पाएमा रास्वपाले तनहुँ १ बाट निर्वाचित भएका स्वर्णिम वाग्लेलाई मन्त्रीमा अगाडि सार्ने छ ।

यसअघि सरकारमा सहभागी हुने गरी रास्वपाले प्रधानमन्त्री पुष्पकमल दाहाललाई दोस्रोपटक ६ चैतमा विश्वासको मत दिएको थियो । तर, रास्वपाबाहेकका दलहरूलाई समेटेर प्रधानमन्त्रीले मन्त्रिपरिषद् विस्तार गरेपछि रास्वपा असन्तुष्ट भएको थियो । सरकारमा सहभागी नभए पनि संसदीय समितिमा तीनवटा समिति सभापतिमा रास्वपाले दाबी गरेको थियो । समिति सभापतिमा पनि रास्वपाले कतिवटा पाउने सहमति भएको छैन । समिति सभापतिका लागि पनि रास्वपाले सरकारलाई दिएको विश्वासको मत कायम राखेको हो ।

गृहसहितको मन्त्रालय दिन प्रधानमन्त्री तयार हो ?

चितवन पुगेर प्रधानमन्त्री प्रचण्डले पनि रास्वपा सरकारमा सहभागी हुने विषयमा छलफल भइरहेको बताएका छन् । ‘रास्वपाले वर्तमान सरकारलाई दिएको समर्थन फिर्ता लिँदैन । सो पार्टी पनि सरकारमा आउने कुरा चलिरहेको छ,’ प्रधानमन्त्री प्रचण्डले भने । रास्वपाले पहिलाका मन्त्रालय माग्नु अस्वभाविक नभएको बताउँदै उनले सत्तासाझेदार दलका बीचमा सरसल्लाह गरेर सहमतिमा अगाडि बढ्ने बताए ।