चितवन, वैशाख २२ : चितवनमा आज विभिन्न ठाउँमा शंकर कँडेलको मृत्यु प्रकरणलाई लिएर दोषीलाई कारबाहीको लागि प्रदर्शन भइरहेको छ ।

आत्महत्या दुरुत्साहनका दोषीलाई प्रहरीले पक्राउ नगरेको भन्दै नेपाली कांग्रेसका नेता तथा कार्यकर्ता र व्यवसायीले टायर बालेर प्रदर्शन गरेका हुन् ।

चितवन प्रहरीमा कँडेललाई आत्महत्या गर्न बाध्य पारेको भन्दै कँडेलकै व्यवसायिक साझेदार प्रदिप रुंगटा र अनमोल फिड्सका चार्टर्ड एकाउन्टेन्ट जीवन रावलविरुद्ध परिवारले किटानी जाहेरी दिएका छन् । किटानी जाहेरी दिँदा पनि प्रहरीले अभियुक्तलाई पक्राउ नगरेकोमा चितवन कांग्रेस र व्यवसायी आक्रोशित छन् ।

कँडेल चितवनका सफल व्यवसायी मात्र नभएर नेपाली कांग्रेस चितवनका पूर्वकोषाध्यक्ष तथा महासमिति सदस्य भएकोले पनि यो घटनाले सडकदेखि सामाजिक सञ्जालसम्म चर्चा पाएको छ । कँडेलले मंगलबार साँझ चितवन भरतपुर महानगरपालिका–३ बेलचोकमा रहेको आफ्नै अफिसमा झुण्डिएर आत्महत्या गरेपछि अर्का व्यवसायी प्रदिप रुँगटाको आत्महत्या दुरुत्साहनमा नाम जोडिएको छ ।

ठूलठूला समस्यासँग जुध्नसक्ने कँडेलको आत्महत्या र सुसाइड नोटमा उल्लेख भएका उद्योगी प्रदीप रुंगटा अरु कोही नभएर कम्पनीका व्यवसायिक साझेदार हुन् । परिवारको जाहेरीपछि रुंगटालाई प्रहरीले खोजिरहेको छ । उनी सम्पर्कवाहिर छन् । सडकमा उनको पक्राउको माग गर्दै नागरिकले नारा लगाइरहेका छन् ।

वीरगञ्ज र विराटनगरमा पोषक दाना उत्पादन गरिरहेका प्रदिप रुंगटाको समूहले अनमोल फिड्सको ८५ प्रतिशत शेयर किनेपछि उनको चितवनसँगको सम्पर्क झनै बढ्न गएको हो । नेपालकै सबैभन्दा ठूलो पोषक दाना उत्पादन गर्ने प्रदिप रुंगटाले १२ वर्ष अगाडिदेखि चितवनका दाना उद्योगका लागि मकै, भटमास, पिना जस्ता कच्च पदार्थको सप्लाइ गर्दथे । आफैँले दाना उद्योग खोलेपछि उनले कच्चा पदार्थको सप्लाई छाडेका थिए । रुंगटाले अनमोल फिड्सको सेयर किनेसँग उत्पादन ५० प्रतिशत कटौटी गरे । दैनिक ६० टन उत्पादन गर्दै आएको उद्योगले ३० टन मात्र उत्पादन गर्न थाल्यो ।

रुंगटा नेपालको नम्बर वान दाना उत्पादकभित्र पर्छ । यो समूहले पोषक ब्राण्डमा दाना उत्पादन गर्दै आएको छ । यो वाहेक समूहले पर्ल ब्राण्डमा चामल प्रोसेसिङ गरेर बेच्दै आएको छ भने दिब्य रिफाइन आयल पनि छ । खाद्यान्न उद्योगमा पनि साम्राज्य खडा गरेको रुंगटा समूहलाई उनले ८५ प्रतिशत सेयर १ अर्ब १५ करोड रुपैयाँमा उद्योग बेचे । दाना उद्योगमा कँडेलको १५ प्रतिशतको मात्र हिस्सा थियो । तीन महिनाअघि कँडेल र प्रदीपबीच डिल भयो । उद्योग रुङटाले लिने र व्यवस्थापन पनि उनैले चलाउने सहमति भएको थियो।

सहमति अनुसार यही वैशाख ७ गते कँडेल र उनका १५ जना अन्य साझेदारले कानुनी रूपमा रुङटाका नाममा दाना उद्योग नामसारी गरिदिएका थिए । त्यस बेला उनीहरूले एक पैसा पनि लिएका थिएनन् । यसपछि कँडेललाई उनका साझेदार साथीले पैसाका लागि ताकेता गर्न थाले । साझेदारले मात्र नभएर बजारमा तिर्नुपर्ने कच्चा पदार्थका आपूर्तिकर्ता र अन्यले पनि कँडेललाई नै ताकेता गरे । कँडेलले मैले सबै रुङटालाई जिम्मा लगाइसकेको छु भनेर व्यवसायीलाई भन्दा पनि धर पाएनन् । आफ्नो पालाका आपूर्तिकर्ताले उनलाई नै दबाब दिइरहे । यसपछि कँडेल बारम्बार रुङटासित रकमका लागि जान थाले । रुङटाले मेरो बजारबाट पैसा उठ्नुछ, उठेपछि दिन्छु भन्दै आनाकानी गरिरहे ।

यसैबिच एक दिन कँडेललाई रुङटाले आफ्नो कार्यालयभित्र छिर्न पनि दिएनन् । कारखानाभित्र पस्न पनि उनलाई बन्देज लगाइयो । कँडेलले उद्योगको हैसियतले चढिरहेको पजेरो गाडी पनि रुङटाले खोसे । यसपछि कँडेलले आत्महत्याको बाटो समाए ।