चितवन, वैशाख ३० : चितवनका पोल्ट्री व्यवसायी शंकरप्रसाद कँडेल मृत्यु भएको शनिबार १२ दिन बित्दा पनि आत्महत्या दुरुत्साहनको मुख्य आरोपी प्रदिप रुगटा पक्राउ पर्न सकेका छैनन् ।
चितवन प्रहरीले कँडेल परिवारले दिएको किटानी जाहेरीको आधारमा आत्महत्या दुरुत्साहनका आरोपी प्रदिप रुंगटालाई अहिलेसम्म पक्राउ गर्न नसकेको हो । उनी भारत भागेको अनुमान गरिएको छ । जिल्ला प्रहरी कार्यालय चितवनका प्रहरी निरीक्षक निर्मल पनेरुले रुगटाको खोजी भइरहेको तर पत्ता लगाउन नसकिएको नारायणी अनलाइनलाई जानकारी दिए ।
घटना आत्महत्या दुरुत्साहनमा केन्द्रित भए पनि अहिलेसम्मको प्रारम्भिक अनुसन्धानमा घटनाका अन्य ‘शंकास्पद’ पाटाहरू खुल्न सकेका छैनन् ।
कँडेलको न्यायको लागि यसअघि विभिन्न विरोधको कार्यक्रममा संलग्न रहेका चितवन कांग्रेसका पूर्वसभापति जितनारायण श्रेष्ठले गृहमन्त्रालयले रुगटा भारततिर भागिसकेको जानकारी गराएको बताए । उनले भने, ‘ सरकारले रुगटा र उनको श्रीमतीको नाममा रहेको सम्पति र बैँकमा रहेको पैसा भोगचलन गर्नबाट रोक लगाएको छ । ’
वैशाख १९ गते कँडेल भरतपुर महानगरपालिका–३ बेलचोकमा रहेको आफ्नै अफिसमा झुन्डिएको अवस्थामा साँझ फेला परेका थिए । प्रहरीले घटनास्थलबाट आठ पृष्ठ लामो सुसाइड नोट समेत फेला परेको थियो । सुसाइड नोटमा उनको व्यवसायसँग जोडिएका दुई जनाको नाम लिएका थिए । जसको आधारमा प्रहरीले घटनाको अनुसन्धान गरिरहेको छ । कँडेलको आत्महत्यासँगै नेपाली कांग्रेस चितवन र उनका समर्थकहरुले चितवन बन्द गर्नुको साथै चितवनमा चक्का जाम गरेर फरार अभियुक्तलाई पक्राउ गर्न दबाब दिएका थिए ।
त्यस्तै, कँडेल नेपाली कांग्रेसको पूर्व कोषाध्यक्ष तथा महासमिति सदस्य पनि भएकोले चितवन कांग्रेस सभापति राजेश्वर खनालसहितको एक प्रतिनिधि मण्डलले प्रधानमन्त्री प्रचण्ड, गृहमन्त्री नारायणकाजी श्रेष्ठ र कांग्रेस सभापति शेरबहादुर देउवालाई पनि भेटेको थियो ।
आत्महत्या दुरुत्साहनमा उजुरी परेपछि प्रहरीले कम्पनीमा कार्यरत चार्टर्ड एकाउन्टेन्ट जीवन रावललाई भने पक्राउ गरेर हिरासतमा राखेको छ । रावललाई भने वैशाख २१ गते बारा जितपुर सिमराबाट पक्राउ गरेको हो । केन्द्रीय अनुसन्धान ब्युरो (सीआइबी) टोलीको सहयोगमा उनलाई नियन्त्रणमा लिइएको हो । यता रुंगटा भने फरार रहेका छन् । उनी देश बाहिर रहेको प्रहरीको अनुसन्धानमा खुलेको छ । यस घटनामा जिल्ला प्रहरी कार्यालय चितवनको टोलीले अनुसन्धान गरिरहेको छ । त्यस्तै फरार रुगटालाई खोजी गर्न सीआइबीको टोलीले पनि सहयोग गरिरहेको जनाइएको छ । उनी भारतमा लुकेर बसेको प्रहरीको आशंका रहेको छ । केही महिनाअघि मृतक कँडेलले आफ्नो नेतृत्वको अनमोल फिड्स एक अर्ब १५ करोडमा बेचेका थिए । आन्तरिक हिसाब मिलानका क्रममा रुंगटाले रावललाई मानसिक दबाब दिएको खुलेको छ ।
२०७५ भदौ १ गतेदेखि लागू भएको मुलुकी अपराध संहिता ऐनको नयाँ नियममा आत्महत्या दुरुत्साहन घटना समावेश गरिएको हो । ऐनको दफा १८५ मा आत्महत्या गर्न कसैले कसैलाई दुरुत्साहन गरे कारबाही हुने व्यवस्था छ । त्यसपछि प्रहरीले यस्ता घटनामा प्रहरीले मानिस पक्राउ गरेर अनुसन्धान गर्न थालेको हो । मृतकले लेखेको सुसाइड नोट, भिडियो, आफन्तले दिएको उजुरी लगायतका आधारमा प्रहरीले यस्ता घटनाको अनुसन्धान गर्दै आएको छ । व्यवसायी रुंगटालाई पक्राउ गरेर अनुसन्धान गर्ने पहिलो प्रमाण घटनास्थलमा भेटिएको नोट र पीडित परिवारको उजुरी बनेको छ ।
प्रहरीले घटनाको अनुसन्धानमा थप प्रमाण खोजिरहेको छ । प्रहरीले रुगटालाई पक्राउ गरेर अनुसन्धानपछि फाइल सरकारी वकिल कार्यालय हुँदै अदालतमा पु¥याउने छ । त्यसपछि आत्महत्या गर्न दुरुत्साहित गरेको प्रमाणित भए ऐनको दफा १८५ अनुसार अधिकतम पाँच वर्षसम्म कैद र पचास हजार रुपैयाँसम्म जरिवाना वा दुवै हुने छ ।
