गुञ्जनगर । पश्चिम चितवनको मध्यभागमा अवस्थित गुञ्जनगर खानेपानी तथा सरसफाइ उपभोक्ता समितिले वितरण हुने खानेपानीको गुणस्तर सुधार र क्षमता विस्तार सुरू गरेको छ । वितरण गरिँदै आएको खानेपानीको क्षमता बढाएर गुणस्तर सुधार गर्न थप आयोजना सुरू गरिएको हो ।

भरतपुर महानगरपालिका वडा नं–१८ को पूरै भाग र १७, १९, २०, २६ वडाका आंशिक भागहरु कार्यक्षेत्र रहेको यसको डिप बोरिङ भरतपुर–१८, गुञ्जनगर र भरतपुर–२०, नयाँबजारमा रहेका छन् । गुञ्जनगर सहलगानी खानेपानी तथा सरसफाइ आयोजना निर्माणका लागि संस्थाको ब्लक ‘बी’अन्तर्गत भरतपुर–२०, नयाँबजारमा ४ लाख ५० हजार लिटरको ओभरहेड ट्याङ्की, डिप बोरिङ, निर्माण र केही पाइपलाइनहरु विस्तारका लागि आयोजना कार्यान्वयनका निम्ति त्रिपक्षीय सम्झौता भएको अध्यक्ष महेन्द्र गुरूङले बताए । ओभरहेड ट्याङ्की (७०/३०) मोडलमा ९ करोड ९० लाख ४५ हजार ७३१.२७ पैसा लागतको फाइल बनाई संघीय खानेपानी तथा ढल व्यवस्थापन आयोजना भरतपुरमा पेस गरिएकोमा खानेपानी मन्त्रालय, खानेपानी तथा ढल व्यवस्थापन विभाग, भरतपुर महानगरपालिकाको समर्थनमा ६ करोड ९३ लाख ३२ हजार स्रोत सहमतिका लागि अर्थ मन्त्रालय पठाइएकोमा ५ करोड स्रोत सहमति प्राप्त भएको जानकारी संघीय खानेपानी तथा ढल व्यवस्थापन आयोजना भरतपुरबाट प्राप्त भएको अध्यक्ष गुरूङले बताए ।

गुञ्जनगर सहलगानी खानेपानी आयोजनाको कुल लागत ९ करोड ९० लाख ४५ हजार ७३१ रूपैयाँ २७ पैसामध्ये उपभोक्ता संस्थाबाट लागत सहभागिताबापत ५ प्रतिशत अर्थात् ४९ लाख ५२ हजार २८६ रूपैयाँ उपभोक्ता संस्थाबाट अग्रिम नगद रकम जम्मा गरेको उनले बताए । २५ प्रतिशत अर्थात् २ करोड ४७ लाख ३१ हजार ४३२ रूपैयाँ रकम नगर विकास कोषले ऋण लगानी गर्नेछ । उक्त रकम महसुल वा अन्य आयबाट उठेको रकमबाट उपभोक्ता संस्थाले पूर्ति गर्नुपर्ने भन्दै अध्यक्ष गुरूङले नेपाल सरकारले भने आयोजनाको ७० प्रतिशत अर्थात् ६ करोड ९३ लाख ३२ हजार ११ रूपैयाँ ८९ पैसा व्यहोर्ने बताए ।

सम्झौताअनुसार संघीय खानेपानी तथा ढल व्यवस्थापन कार्यालयले आयोजनाको योजना तर्जुमा, व्यवस्थापन र कार्यान्वयन गर्ने तथा स्थानीय तह र उपभोक्ता संस्थाहरुसँगको समन्वय सुनिश्चितलगायत जिम्मेवारी निर्वाह गर्नुपर्ने भन्दै उनले भरतपुर महानगरपालिकाले सहलगानी खानेपानी आयोजना निर्माणका लागि उपभोक्ता वर्गबाट २ करोड ९७ लाख १३ हजार ७१९ रूपैयाँ उठाउनुपर्ने बताए ।

उपभोक्ता संस्थाले खानेपानी सेवा सञ्चालन, बोलपत्र मूल्याङ्कनमा आमन्त्रित सदस्यको रुपमा सहभागी हुने, निर्माण लागतमा सहलगानी गर्ने, निर्माण कार्यको सुपरिवेक्षण तथा बिलको रकम भुक्तानी गर्ने, विवाद आइहालेमा विवाद निरुपण गर्नेलगायतको जिम्मेवारी हुने उनले बताए ।

खानेपानी संस्थाको सेवा क्षेत्रमा अत्यधिकरुपमा बसाइँसराइ भई आएकाले र उक्त क्षेत्रका बस्तीहरु सहरउन्मुख हुँदै गइरहेकाले बढ्दो जनसंख्यालाई खानेपानी व्यवस्थापनका लागि वार्षिकरुपमा सेवा सुधार विस्तार गर्नुपर्ने आवश्यकता रहेको भन्दै अध्यक्ष गुरूङले क्षमता विस्तार र गुणस्तर सुधार गरेपछि पश्चिम चितवनमा पर्याप्त मात्रामा खानेपानी आपूर्ति गर्न सकिने बताए । यसले हाल औसत प्रतिदिन १८ लाख लिटर खानेपानी वितरण गरेको र सेवाबाट लाभान्वित हुने उपभोक्ताहरुको संख्या २९ हजार अनुमानित रहेको अध्यक्ष गुरूङले बताए ।

नेपाल सरकारको ९०/१० को मोडालिटीमा खानेपानी तथा सरसफाइ डिभिजन कार्यालय भरतपुर चितवनमार्फत २०६३ असारमा गुञ्जनगर खानेपानी उपभोक्ता समितिसँग ४ करोड २६ लाख लागतमा सम्झौता भई ४.५ लाख लिटरको ओभरहेड ट्याङ्कीको निर्माण कार्य सम्पन्न भएको उनले बताए ।

संस्थाको आफ्नै स्रोत परिचालन गरी खानेपानी विस्तार भइरहेको भन्दै उनले खानेपानीबाट लाभान्वित घरधुरी ५ हजार २९० र जम्मा धारा संख्या ३ हजार ६९४ रहेको बताए । भरतपुर महानगरपालिकाको सहयोगमा ७ युनिटसम्म खपत गर्ने उपभोक्ताहरुलाई छूटको व्यवस्था र समयमा भुक्तानी गर्नेलाई छूट विलम्ब भएमा जरिवानाका साथै सामुदायिक विद्यालयहरुलाई २५ प्रतिशत पानी महसुलमा छूट रहेको र पानी महसुलसम्म न्यूनतम १२ हजार लिटरको १०० मात्र पर्ने र त्यसपछि प्रतिहजार लिटरको १५ ले थप हुँदै जाने अध्यक्ष गुरूङले बताए ।

धारा जडानमा मठ, मन्दिर, गुम्बाहरुलाई ५० प्रतिशत छूटमा धारा जडान गरिने, वडा कार्यालयको सिफारिसमा प्रतिवर्ष १० वटा धारा विपन्न वर्गलाई छूटमा जडान गरिने भन्दै उनले खानेपानीको भौतिक संरचनाहरु ब्लक ‘ए’ अन्तर्गत वडा नं–१८ मा ९ कठ्ठा र ब्लक ‘बी’मा वडा नं–२० वडा कार्यालयसँगै ५ कठ्ठा रहेको बताए ।