निराज रानाभाट , भरतपुर , चितवन : मानव सेवा आश्रमको आयोजनामा मंसिर २५ गते , आइतबार साँझ चितवनको नारायणगढस्थित क्याम्पाचौरमा भएको नेपथ्य कन्सर्टमा पत्रकार राजेन्द्र आचार्यमाथि कुटपिट भएको छ ।
पत्रकार महासंघ चितवन शाखाका सचिव दिपेन्द्र अधिकारीले मंसिर २६ गते , सोमबार ( अाज ) एक विज्ञप्ति जारी गरि रिपोर्टिङ गर्न जाने क्रममा पत्रकार आचार्यमाथि हातपात भएको घटना निन्दनीय भएको बताएका छन । साथै दोषीलाई कारबाही गर्न उनले जोडदार माग पनि गरेका छन ।
पत्रकार महासंघ चितवन शाखाका कोषाध्यक्ष समेत रहेका आचार्य रिपोर्टिङका लागि कार्यक्रमस्थलमा प्रवेश गर्ने क्रममा सुरक्षाकर्मीले रोक्न खोेजेका थिए । आचार्यले पत्रकार परिचय पत्र देखाउँदा पनि उनीमाथि सुरक्षाकर्मीले हातपात गरेका हुन् । पत्रकारहरुलाई परिचय पत्रका आधारमा रिपोर्टिङ गर्न दिने भनिएपनि पत्रकारलाई अवरोध गरिएको हो ।
पत्रकारलाई स्वतन्त्र रुपमा पत्रकारिता गर्ने वातावरण बनाउन र शान्ति सुरक्षा कायम गर्न महासंघले स्थानीय प्रशासन समक्ष माग गरेको छ ।
