जिल्ला प्रहरी कार्यालय मकवानपुरले ३६ वर्षीया महिलाको हत्यापछि शव गाडिएको घटनाका आरोपितलाई सार्वजनिक गरेको छ । मकवानपुर प्रहरीले जिल्लाको उत्तरी क्षेत्रस्थित इन्द्रसरोबर गाउँपालिका–३, घर भएकी ३६ वर्षीया सरस्वती वाइबाको शव हत्यापछि गाडिएको दाबी गर्दै स्थानीय एक युवकलाई आरोपितका रूपमा सार्वजनिक गरेको हो । प्रहरीले १३ मंसिरमा गाउँबाट बेपत्ता भएकी सरस्वतीको शव शनिबार साँझ आधा शरीर गाडिएको अवस्थामा फेला पारेको थियो ।

सरस्वतीको हत्यापछि शव गाडेको प्रहरीको अनुसन्धानबाट खुलेको मकवानपुरका प्रहरी प्रवक्ता प्रहरी नायब उपरीक्षक टेकबहादुर कार्कीले जानकारी दिए । घटनाका आरोपित स्थानीय ३३ वर्षीय रोज वाइबालाई प्रहरीले पक्राउ गरेको हो । आरोपित वाइबाले गाउँमै हिँडडुल गरिरहेको बेला बाटोमा भेट हुँदा सोधेको प्रश्नमा सिधा उत्तर नदिएकाले आवेशमा आई हत्या गर्न पुगेको बयान प्रहरीलाई दिएका छन् । उनले सरस्वतीलाई सामान्य भनाभनकै क्रममा कुटपिट गरेको खुलेको छ ।

‘उनीहरूबीच बाटोमा भेट हुँदा रोजले महिलालाई प्रश्न गरेको र महिलाले सोझो उत्तर नदिएपछि कुटपिट गरेको अनुसन्धानबाट खुलेको छ,’ डीएसपी कार्कीले भने । उनका अनुसार हत्यामा संलग्न आरोपी वाइबा र मृतक महिला छिमेकीसमेत हुन् । कुटपिटबाट भुईंमा रहेको ढुंगामा ठोक्किएकी सरस्वतीलाई हत्यापछि आरोपी वाइबाले आफ्नै बारीमा लगेर पुरेको अनुसन्धानबाट खुलेको छ । उनले घटनामा आफ्नो संलग्नता रहेको स्वीकार गरेको डीएसपी कार्कीले जानकारी दिए ।

घरबाट हिँडेकी श्रीमती फर्किएर नआएपछि उनका श्रीमान् वीरबहादुर वाइबाले स्थानीय सिस्नेरी प्रहरी चौकीमा उजुरी दिएका थिए । जिल्ला प्रहरी कार्यालय मकवानपुरका अनुसन्धान अधिकृत प्रहरी निरीक्षक रामचन्द्र घिमिरेको कमाण्डमा तालिमप्राप्त कुकुरसहित घटनास्थल पुगेको प्रहरी टोलीले खोजी गरिरहँदा साथमै रहेका वीरबहादुरले २४ मंसिरको साँझ साढे ७ बजेको समयमा श्रीमतीलाई खोल्डोमा गाडिएको अवस्थामा फेला पारेका थिए ।

आरोपी वाइबालाई पक्राउ गरी जिल्ला अदालत मकवानपुरबाट ७ दिनको म्याद थप गरी अनुसन्धान भइरहेको डीएसपी कार्कीले बताए ।