स्वास्थ्य तथा जनसङ्ख्या मन्त्रालयले चितवनको भरतपुर स्थित चितवन गार्डेन रिसोर्टमा २३ गते विषाक्त विवाहभोज खाँदा ६५ मानिस एकैपटक बिरामी परेको जनाएको छ।
मन्त्रालयले आज चितवनको भरतपुरका घटनाका सम्बन्धमा जानकारी गराउँदै प्रारम्भिक अनुसन्धानअनुसार विषाक्त खानाका कारणले एकै पटक ६५ मानिस बिरामी परेको बताएको हो। मन्त्रालयले घटनाबारे थप अनुसन्धान गर्न जाँचका लागि नमूना प्रयोगशालामा पठाएको छ।
यही मङ्सिर २३ गते ६५ जनामा २४ घण्टा नबित्दै पखाला लाग्ने, वाकवाकी हुने, वान्ता आउने साथै ज्वरो आउनेजस्ता लक्षण देखिएका थिए। बिरामी भएपछि उनीहरूले औषधि पसल गएर औषधि किनेर खाएका थिए।
स्वास्थ्य अवस्था गम्भीर भएपछि मङ्सिर २६ गते भरतपुरस्थित नेशनल सिटी अस्पतालको आकस्मिक कक्ष तथा बहिरङ्ग विभागमा उपचारका लागि ३५ भर्ना भएको मन्त्रालयले जनाएको छ। अहिले उनीहरू सबैको स्वास्थ्य अवस्था सामान्य रहेको छ।
सोही कार्यक्रममा भोज खाएका थप १५ जना आजै उपचारका लागि अस्पतालमा भर्ना भएका छन्। उनीहरूको स्वास्थ्य अवस्था सामान्य रहेको मन्त्रालयले जनाएको छ।
