काठमाडौं, पुस ८ गते । अध्यागमन विभागले फ्रान्सेली नागरिक चार्ल्स शोभराजलाई त्रिभुवन अन्तर्राष्ट्रिय विमानस्थल लगेको छ ।
सर्वोच्च अदालतको आदेशपछि कैदमुक्त भएका शोभराजलाई स्वदेश फिर्ता गराउनका लागि त्रिभुवन अन्तर्राष्ट्रिय विमानस्थल लगिएको जानकारी अध्यागमन विभागले दिएको छ ।
विभागका निमित्त महानिर्देशक प्रदर्शनी कुमारीले शोभराजलाई कतार एअरवेजको जहाजबाट फ्रान्स पठाउन लागिएको जानकारी दिनुभयो ।
शोभराजलाई आजै (शुक्रबार) सुन्धारास्थित केन्द्रीय कारागारबाट रिहा गरी अध्यागमन विभागमा बुझाएको थियो ।
सर्वोच्च अदालतले बुधबार १५ दिनभित्र डिपोर्ट (नेपाल छाड्ने) आदेश दिएको थियो । शोभराजलाई आज साँझको उडानबाट फ्रान्स पठाइने जानकारी सूचना अधिकारी पाण्डेले दिनुभयो ।
सन् १९७५ मा दुई विदेशी नागरिकको हत्या र फर्जी राहदानी प्रयोग गरेको अभियोगमा शोभराजलाई सर्वस्वसहित जन्मकैद हुनेगरी छुट्टाछुट्टै मुद्दा चलाइएको थियो ।
शोभराजलाई बिकिनी किलर, सिरिअल किलर र द सर्पेन्ट आदि विभिन्न उपनामले चिनिन्छ ।
