नेपाली कांग्रेसका नेता दीपक खड्काले खुला केन्द्रीय सदस्यमा सर्वाधिक मत ल्याएका निवर्तमान महामन्त्री शशांक कोइराला पन्ध्रौैं महाधिवेशनमा सभापतिको उम्मेदवार हुने बताएका छन् ।
नेपाली रेडियो नेटवर्क (एनआरएन) को कार्यक्रम नेपाली बहसका लागि पत्रकार ऋषि धमलासँग कुरा गर्दै नेता खड्काले भने, “चौधौं महाधिवेशनमा खुला केन्द्रीय सदस्यतर्फ शशांक कोइरालाले झन्डै ९० प्रतिशत लोकप्रिय मत ल्याउनुभएको छ । टिमभित्र सर्वसम्मत सभापति नहुने भएपछि ‘तपाईंहरु मिल्नोस्’ भनेर उहाँले ठूलो त्याग गर्नुभयो । तर आम कार्यकर्ताको उहाँप्रति तीव्र चाहना देखियो । पन्ध्रौ महाधिवेशनमा स्वभाविक रुपमा उहाँ सभापतिको उम्मेदवार बन्नुहुन्छ ।”
चौधौं महाधिवेशनले रुपान्तरण र परिवर्तनका पक्षमा ४५ प्रतिशत नयाँ अनुहारको प्रतिनिधित्व हुनु सुखद रहेको उनले टिप्पणी गरे । नयाँ र पुरानोको सम्मिश्रण पार्टी अगाडि बढ्ने उनको जिकिर छ ।
दोस्रोचोटि पार्टी सभापति बनेका शेरबहादुर देउवाले कांग्रेस रुपान्तरणको जिम्मेवारी पाएको पनि उनले औंल्याए । उनले थपे, “देउवा दोस्रोचोटि पार्टी सभापति बन्नुभयो । त्यसअघि पनि नेपाली कांंग्रेस प्रजातान्त्रिकको नेतृत्व गर्नुभएको थियो । कांग्रेसमा उहाँ सर्वस्वीकार्य व्यक्ति हुनुहुन्छ । पाँचौं चोटि प्रधानमन्त्री हुनुभएको छ । उहाँको साथमा अनुभवीका साथै नयाँ र प्रखर साथीहरु आउनुभएको छ । उहाँसँँग हामीले जनचाहनाअनुसार पार्टी रुपान्तरण भएको र देखिने गरी काम गर्ने अपेक्षा राखेका छौं ।”
पार्टीमा रामचन्द्र पौडेल, प्रकाशमान सिंह, विमलेन्द्र निधि, कृष्ण सिटौला, नारायण खड्का आदि नेताहरुलाई समेटेर लैजान उनले सभापति देउवालाई सुझाव दिए । उनले भने, “केन्द्रीय कार्यसमितिमा मिश्रित छनोट भएको छ । अब कांग्रेस गुटरहित उद्दश्यमा अघि बढ्छ ।”
एमसीसी राष्ट्रिय मुद्दा भएकाले सबै दलसँग छलफल गरेर निक्र्यौल गर्नुपर्ने उनले औंल्याए । संखुवासभा कांग्रेसका सभापतिसमेत रहेका खड्काले भने, “एमसीसी साझा मुद्दा हो । यस्ता अनुदान सहायता हामीलाई चाहिन्छ । त्यसलाई पारित गर्नु सरकारमा बस्ने दलको कर्तव्य हो । सहमति भएन, बहुमत नभए स्वतः पारित हुँदैन । तर त्यसका लागि संसद् अवरोध खोल्नुपर्छ ।” यो समाचार रिपोटर्स नेपालमा प्रकाशित भएको छ।