भरतपुर । चितवनमा एकैरातमा पाँच जना कोरोना सङ्क्रमितले ज्यान गुमाएका छन् । दसैँपछि चितवन जिल्लामा कोरोना सङ्क्रमितको मृत्यु हुनेक्रम बढिरहेको छ भने सङ्क्रमितको संख्या पनि वृद्धि भइरहेको छ ।

एक रातमा भरतपुर अस्पतालमा दुई जना र चितवन मेडिकल कलेजमा तीन जनाले कोरोना भाइरसको सङ्क्रमणबाट ज्यान गुमाएका छन् । भरतपुर अस्पतालका सूचना अधिकारी लीलाधर पौडेलका अनुसार उपचारको क्रममा दुई कोरोना सङ्क्रमितको आइतबार राति ज्यान गएको हो ।
चितवन मेडिकल कलेजका कोभिड प्रेस संयोजक डा. किशोर अधिकारीले एकैरातमा तीन जना कोरोना सङ्क्रमितको ज्यान गएको बताए । उनले भने, ‘एक जना कोरोना सङ्क्रमितलाई राति भर्ना गरियो, उनको उपचार थालेको झन्डै एक घन्टामै मृत्यु भएको छ ।’

भरतपुर अस्पतालमा मृत्यु भएका दुई जना सङ्क्रमितमध्ये एक पुरूष र एक महिला छन् । दुवै ६० वर्षमाथिका हुन् । भरतपुर–१० निवासी ७९ वर्षीय पुरूष र धादिङको नीलकण्ठ नगरपालिका–३ निवासी ६१ वर्षीया महिलाको मृत्यु भएको भरतपुर अस्पतालले जनाएको छ ।
सूचना अधिकारी पौडेलका अनुसार भरतपुर महानगरपालिका–१० का ७९ वर्षीय पुरूषमा कात्तिक १३ गते कोरोना सङ्क्रमण पुष्टि भएको थियो । श्वासप्रश्वासमा समस्या भएपछि परिवारले उनलाई कात्तिक १६ गते भरतपुर अस्पतालमा भर्ना गरेका थिए । कोभिड आइसियू कक्षमा राखेर उपचार हुँदै गर्दा उनको मृत्यु भएको सूचना अधिकारी पौडेलले बताए । उनको आइतबार राति मृत्यु भएको अस्पतालले जनाएको छ ।
धादिङको नीलकण्ठ नगरपालिका–३ की ६१ वर्षीया सङ्क्रमित महिला कात्तिक ५ गतेदेखि नै अस्पतालको आइसोलेसनमा बसेकी थिइन् । कात्तिक ९ गते उनको कोभिड आइसियूमा उपचार भएको भरतपुर अस्पतालले जनाएको छ । उपचारकै क्रममा ती सङ्क्रमित महिलाको आइतबार राति मृत्यु भएको थियो । गत कात्तिक ५ गते कोभिड सङ्क्रमणसहित श्वासप्रश्वासमा समस्या भई ती महिला अस्पतालको आइसोलेसनमा थिइन् ।

यस्तै, आइतबार राति चितवन मेडिकल कलेजमा तीन जना कोरोना सङ्क्रमितको मृत्यु भएको छ । चितवन मेडिकल कलेजमा भरतपुर–४ निवासी ६३ वर्षीय पुरूष, भरतपुर–३ का ५३ वर्षका पुरूष र नवलपुर देवचुली–११ का ८० वर्षका पुरूष सङ्क्रमितको मृत्यु भएको डा. अधिकारी बताउँछन् । तीन जनाको आइतबार राति मृत्यु भएको हो ।

भरतपुर–४ निवासी ६३ वर्षीय पुरूष श्वासप्रश्वासमा समस्या भएपछि कात्तिक १२ गते अस्पतालको कोभिड आइसियूमा भर्ना भएका थिए । १३ गते उनमा कोरोना पोजेटिभ देखिएको थियो । उनी मधुमेहका बिरामी रहेका थिए । उनको आइतबार राति मृत्यु भएको हो ।
भरतपुर–३ का ५३ वर्षका पुरूष सङ्क्रमितको चितवन मेडिकल कलेज भर्ना भएको झन्डै एक घन्टामै आइतबार राति नै मृत्यु भएको थियो । यस्तै, नवलपुर देवचुली–११ का ८० वर्षका पुरूष कात्तिक १६ मा अस्पताल भर्ना भएका थिए । उनमा १४ गते कोरोना देखिएको थियो । उनको पनि आइतबार राति नै मृत्यु भएको थियो ।

स्वास्थ्य कार्यालय चितवनका अनुसार हालसम्म कोरोनाबाट ६७ जना चितवनवासीको मृत्यु भएको छ भने ४ हजार ४५३ जना कोरोना सङ्क्रमित पुगेका छन् ।