चितवन , पौष १८ 

नेपाली कांग्रेस चितवनको अधिवेशनको मिति तोकेसँगै चितवन कांग्रेसभित्र चुनावी माहोल पुनः तातिएको छ । पटकपटक अधिवेशनको मिति सर्दै यहाँसम्म आइपुग्दा नेताहरुलाई चुनावी प्रचारप्रसारमा दौडधुप गर्ने क्रम पनि त्यत्तिकै लम्बिएको छ । पार्टीको जिल्ला सभापति पदमा आकाङ्क्षा देखाएका ६ जना नेताहरु पुनः प्रचारप्रसारमा दौडिएका छन् ।

बागमती प्रदेशका उद्योग, वाणिज्य तथा आपूर्ति मन्त्री मिलनबाबु श्रेष्ठ, चितवन जिल्लाका उपसभापति कैलाश कोइराला, सचिव उत्तम जोशी, प्राडा सूर्यकान्त घिमिरे, राजेश्वर खनाल र विजयराज भूसाल जिल्ला सभापति बन्ने दौडमा लागेका छन् । हालसम्मको स्थिति हेर्दा सभापति पदका कुनै पनि उमेदवार पछि हट्ने सम्भावना देखिँदैन ।

तैपनि पार्टीभित्र विभिन्न चरणको छलफल चलिरहेको कांग्रेस चितवनले जनाएको छ । ‘हालसम्म उमेदवार घोषणा गर्नुभएका नेताहरुले अडान छाड्नुभएको छैन, ‘सभापति पदका उमेदवारसमेत रहेका जिल्ला सचिव उत्तम जोशीले भने, ‘आन्तरिकरुपमा चुनावी तयारी सबैले गरिरहनुभएकै छ ।’

हालसम्म अडान नछाडे पनि अन्तिम अवस्थासम्ममा उमेदवारको संख्या घट्न सक्ने सम्भावना पनि नभएको होइन । ‘हामीले चुनावी मैदानमा जाने तयारी तीव्र पारेका छौँ । तर, अन्तिमसम्ममा एकले अर्कालाई सघाउने विषयमा पनि छलफल भइरहेको छ, ‘सभापतिका अर्का उमेदवार विजयराज भूसालले भने, ‘अहिलेसम्मको अवस्थालाई हेर्दा भने कोही पनि पछि हट्ने सम्भावना देखिएको छैन ।’

तर, अर्का उमेदवार कैलाश कोइरालाले भने कुनै पनि हालतमा पछि नहट्ने बताए । ‘छलफल त चलिरहन्छ, तर म कुनै पनि हालतमा पछि हट्दिनँ, ‘उनले भने । चितवन कांग्रेसमा जिल्ला नेतृत्व छान्नको लागि दुई हजार ९०० बढी मतदाता छन् ।

अझै तोकिएन जिल्ला निर्वाचन अधिकृत

तत्कालीन जिल्ला निर्वाचन अधिकृतको जिम्मा पाएका कमलमोहन पोखरेलले गत मंसिर १४ गते पदबाट राजीनामा दिएपछि अनिश्चित बनेको चितवन कांग्रेसको अधिवेशन पुस २७ हुने विषय अझै निश्चित भने बनिसकेको छैन । पार्टीले जिल्लाको अधिवेशनको मिति तोके पनि जिल्ला निर्वाचन अधिकृत नतोकेको जिल्ला सचिव उत्तम जोशीले बताए ।

पोखरेलले मंसिर १५ मा मनोनयन दर्ता गरेर १९ गते निर्वाचन गराउने भनेर मिति तोके पनि मनोनयन दर्ता गराउने अघिल्लो दिन पदबाट राजीनामा दिएपछि जिल्लाको अधिवेशन अनिश्चित बनेको हो । त्यसपछि प्रदेश र केन्द्रको अधिवेशन भएकोले पनि जिल्लाको अधिवेशन पर धकेलिएको हो ।

निर्वाचन अधिकृत नतोकिए पनि पुस २७ मै अधिवेशन सम्पन्न हुने उनले दाबी गरे । ‘निर्वाचनको मितिसम्ममा निर्वाचन अधिकृत तोकेर आइसक्छन्,‘ उनले भने, ‘त्यसैले २७ गतेभन्दा पनि पुनः अधिवेशन सर्दैन ।’

केन्द्रीय समितिमा भने चितवनबाट पाँच जनाले नेतृत्व पाइसकेका छन् । नेपाली कांग्रेसको इतिहासमै पहिलोपटक चितवन जिल्लाले एकैपटक पाँच जनाले केन्द्रीय समितिमा अवसर पाएका हुन् ।