निराज रानाभाट , चितवन : चितवन , नवलपुर र तनहुँ जिल्लाको सिमानामा पर्ने पवित्र तीर्थस्थल देवघाटधाममा लाग्ने माघे सङ्क्रान्ति मेलाको तयारी तीब्र पारिएको छ । मेला व्यवस्थित गर्न ३ वटै जिल्लामा गरि ७ सय ५० भन्दा बढी सुरक्षाकर्मीहरु परिचालन गरिने भएको छ ।
देवघाट मेला व्यवस्थापन मूल समितिको मङ्गलबार भरतपुरमा बसेको बैठकले मेलालाई सभ्य र भव्य रुपमा सम्पन्न गर्ने बारे छलफल भएको छ । चितवनका प्रमुख जिल्ला अधिकारी अशमान तामाङले देवघाट मेलालाई व्यवस्थित गर्न नवलपुर र तनहुँसँग समन्वय गरी काम थालिएको बताए । “ माघे सङ्क्रान्ति मेलाका लागि नेपाल प्रहरी र सशस्त्र प्रहरी परिचालन गर्छौँ ”, उनले भने , “ स्नानको समयमा कुनै दुर्घटना नहोस् भनेर स्नानघाट नजिकै गोताखोर प्रहरी समेत तयारी अवस्थामा राख्छौँ । ”
प्रहरी उपरीक्षक ओमप्रसाद अधिकारीले चितवनको देवघाटतर्फ प्रहरी नायब उपरीक्षकको नेतृत्वमा ४ सय ८१ सुरक्षाकर्मीहरु परिचालन गरिने बताए । त्यस्तै , तनहुँतर्फ १ सय ५० प्रहरी परिचालन गरिने इलाका प्रहरी कार्यालय देवघाटका प्रमुख सुशील लामिछानेले बताए । नवलपुरतर्फ ६० भन्दा बढी प्रहरी परिचालन गरिने छ । सशस्त्र प्रहरी बल १७ नम्बर गण आँपटारीका प्रहरी नायब उपरीक्षक सुशील शाहीले विपद् व्यवस्थापन गर्न समेत सशस्त्र प्रहरी परिचालन गर्न लागिएको बताए ।
मेला अवधिभर लोडसेडिङ नहुने गरि तयारी गरिएको नेपाल विद्युत् प्राधिकरण भरतपुर शाखाले जनाएको छ । शाखाका सूचना अधिकारी राजेन्द्रप्रसाद पौडेलले देवघाटमा बत्ती मर्मत र आकस्मिक कामका लागि यहीँ पुस ३० गतेदेखि नै ६ जनाको प्राविधिक टोली परिचालन गरिने बताए । चितवनको भरतपुर महानगरपालिका – ०१ को देवघाट क्षेत्रमा र भरतपुर महानगरपालिका – २९ को दासढुङ्गाबाट विद्यत् आपूर्ति गरिएको छ ।
ट्राफिक प्रहरी कार्यालय चितवनका प्रमुख भगवानराज थापाले माघ ०१ गते देवघाटमा एकतर्फी मात्रै यातायात सञ्चालन गर्नेगरि रुट निर्धारण गरिएको बताए । “ हामीले देवघाट जानका लागि रामनगर र ठिमुराबाट रुट निर्धारण गरेका छौँ ”, उनले भने , “ रामनगर र ठिमुराबाट देवघाट प्रवेश गरेका सवारीसाधन वागीश्वरी , आँपटारी हुँदै नारायणगढ फिर्ता हुने छन । ” शव – वाहन र एम्बुलेन्सबाहेकका सवारीलाई आँपटारीबाट देवघाट जान पूर्ण रूपमा निषेध गरिने थापाले बताए ।
राजधानी काठमाडौं तथा कास्की जिल्लाको पोखराबाट देवघाट स्नानका लागि आउने सवारीलाई दासढुङ्गाको पुल तरेर तनहुँतर्फ पठाइने थापाले बताए । सो क्रममा चितवन र तनहुँको देवघाटलाई जोड्ने झोलुङ्गे पुल जीर्ण भएकाले पुलमा लाइन लगाएर तीर्थयात्रीलाई वारपार गराइने छ । पुलमा एकपटकमा २ सय जनालाई मात्रै छोडिने र उनीहरु वारपार भएपछि मात्रै अर्को समूहलाई तर्न दिइने छ ।
त्रिशूली र कालीगण्डकी नदीको वेणी सङ्गममा स्नानका लागि जान चितवन र नवलपुरतर्फबाट ¥याफ्टिङ डुङ्गासमेत सञ्चालन हुने छन । सो क्षेत्रमा कम्तीमा ३० ¥याफ्टिङ डुङ्गा सञ्चालन गरिने ¥याफ्टिङ डुङ्गा संयोजक सिर्जन शर्माले बताए । नदी तरेर वेणीमा जानका लागि एकतर्फी भाडा रु. ३५ तोकिएको छ । देवघाट क्षेत्र विकास समितका अध्यक्ष बद्रीप्रसाद अधिकारीले तीनवटै जिल्लासँग समन्वय गरेर देवघाट मेलाको तयारी भइरहेको बताए । मेलामा ५ लाखभन्दा बढी दर्शनार्थी आउने अपेक्षा गरिएको छ । तीर्थयात्रीहरुलाई आगो ताप्न धुनीको र पानीको व्यवस्थापन तथा सवारी पार्किङको व्यवस्थापन भइसकेको घिमिरेको भनाइ छ ।
