चितवन २० माघ । चितवन मेडिकल कलेजमा उपचाररत नरबहादुर चेपाङको उपचारमा आर्थिक अभाव भएपछि परिवारले सहयोगको याचना गरेका छन्। गत पुस २८ भीरबाट लडेर घाइते भएका इच्छाकामना १ सप्रेनीका ५६ वर्षीय नरबहादुर चेपाङ हाल चितवन मेडिकल कलेजमा उपचारपछि निको भइसकेका छन्। तर, अस्पतालमा बुझाउनुपर्ने करिब दुई लाख रूपैयाँ रकम अभावकै कारण घर जानुपर्ने बिरामी पनि अस्पतालमै बस्नुपरेको बिरामीका आफन्त डिल्ली चेपाङले बताए।

‘अस्पतालले रकम नबुझाएसम्म घर पठाउन नमानेको हुँदा कतैबाट सहयोग पाए घर लैजान सकिन्थ्यो’ उनले भने, ‘चेपाङ परिवार यति ठूलो रकम जुटाउन सक्ने क्षमता नभएकोले सहयोगको याचना गरेका हौँ।’ केही दिनअघि चितवनको अग्रणी पत्रिका को  अनलाइन संस्करण  इ–चितवन पोष्ट डटकममा नरबहादुर चेपाङले उपचारको पैसा नतिरेको भन्दै आइसियूमै थुनिनुपरेको विषयमा समाचार प्रकाशन भएपछि इच्छाकामना गाउँपालिकाका उपाध्यक्ष कृतिकुमार श्रेष्ठको पहलमा आइसियूबाट वार्डमा सारेको थियो।

तर, अस्पतालमा लागेको सम्पूर्ण खर्चको व्यवस्था नहुँदा वार्डबाट पनि घर लैजान नसकेको उनले बताए। त्यतिबेला गाउँपालिकाका उपाध्यक्ष श्रेष्ठले भनेका थिए, ‘मेरो गाउँपालिकाभित्रको नागरिकको जिम्मा मैले लिन्छु।’ तर, अहिले सामान्य आर्थिक सहयोग गरे पनि अस्पतालमा बुझाउने रकम पूर्ति नभएकोले बिरामी अस्पतालमै बसिरहेका उनको भनाइ छ।

स्रोत : इ-चितवन पोस्ट