धादिङ, ११ असोज । बागमती प्रदेश सरकारको सामाजिक विकास मन्त्रालयले शुरु गरेको ‘एक बिद्यालय एक नर्स कार्यक्रम’ धादिङ जिल्लाका २६ वटा सरकारी माध्यमिक बिद्यालयमा संचालन हुने भएको छ । जिल्लाको १३ वटा स्थानीय तहको प्रत्येकमा दुई/दुई वटा पर्ने गरी यो बर्षबाट बाट २६ ओटा माध्यमिक विद्यालयमा यो कार्यक्रम संचालन हुन लागेको हो ।
आर्थिक बर्ष २०७५/७६ मा वागमती प्रदेशका १३ जिल्लाका २० वटा सरकारी माध्यमिक बिद्यालयमा नमूना कार्यक्रमको रुपमा शुरुवात भएको एक बिद्यालय एक नर्स कार्यक्रम प्रभावकारी वन्दै गएपछि सामाजिक विकास मन्त्रालयले वागमती प्रदेशका ११९ वटै स्थानीय तहमा बिस्तार गरेको हो ।
गएको असार ३१ गते मन्त्रीस्तरको निर्णयबाट प्रदेशका सबैस्थानीय तहमा दुई वटा बिद्यालय पर्ने गरी बिस्तार भएको यो कार्यक्रम धादिङ जिल्लामा २६ वटा बिद्यालयले सञ्चालन हुन लागेको छ । स्वस्थ नागरिक उत्पादन गर्ने उद्देश्यले प्रत्येक बालबालिकाको स्वाथ्य रेखदेखको लागि विद्यालय नर्स कार्यक्रम सुरु गरिएको मन्त्रालयका प्रवक्ता दिपेन्द्र सुवेदीले जनाए । प्रवक्ता सुवेदीका अनुसार कार्यक्रम लागू भएका बिद्यालयमा खटिने नर्सले प्रत्येक विद्यार्थीको स्वास्थ्यबारे जानकारी लिनुका साथै उनीहरूलाई आफूसँगै घर परिवारलाई स्वस्थ रहने तरिकाबारे पनि सिकाउनेछन् ।
नर्सहरूका लागि प्रत्येक विद्यालयले दुईवटा कोठाको व्यवस्था गर्नुपर्नेछ एउटा कोठामा विद्यार्थीका उपचार तथा स्वास्थ्य परामर्श लगायतका सेवा दिन र अर्को कोठा नर्सका लागि आवश्यक सामग्रीहरू राख्नका लागि छुट्याइएको छ । मन्त्रालयले विद्यालयमा खटेका नर्सहरूलाई आवश्यक ल्यापटप, उपचारका सामग्री तथा विभिन्न औषधीहरू समेत उपलब्ध गराउनेछ ।
धादिङमा परिक्षणका रुपमा आर्थिक बर्ष २०७५/७६ मा वेनिघाट रोराङको चन्द्रोदय माविमा शुरुवात गरिएको कार्यक्रम अघिल्लो बर्ष गल्छी र नीलकण्ठ नगरपालिकामा बिस्तार गरिएको थियो ।
