ज्योतिनगर । २३औँ गणेशमान सिंह स्मृति दिवसको अवसर पारेर पश्चिम चितवनको भरतपुर २६ ज्योतिनगर बजारमा बृहत खुल्ला रक्तदान कार्यक्रम सम्पन्न भएको छ ।
नेपाल तरूण दल भरतपुर २६ को आयोजना र नेपाल रेडक्रस सोसाइटी उपशाखा दिव्यनगरको प्राविधिक सहयोगमा सम्पन्न कार्यक्रममा सात महिलासहित ८० जनाले रक्तदान गरेका थिए ।
कार्यक्रमका प्रमुख अतिथि नेपाली कांग्रेस चितवनका सचिव उत्तम जोशीले कोभिड–१९ को सङ्क्रमणको जोखिम सँगसँगै सङ्क्रमितको संख्या बढ्दै गएपछि चितवनमा रगतको अभाव भएकोले रक्तदान गरिएको बताए ।
कार्यक्रममा कांग्रेस प्रशिक्षण विभाग प्रमुख पृथ्वीमान गुरूङ, नेपाल तरूण दलका जिल्ला सभापति राजन ताम्राकार, सचिव प्रल्हाद उप्रेती, कांग्रेस भरतपुर २६ का वडासभापति पुरूषोत्तम कमल ढकाल, कांग्रेस महासमिति सदस्य सोमप्रसाद भण्डारी, उपाध्यक्ष रेशम भुजेललगायतले शुभकामना मन्तव्य व्यक्त गरेका थिए ।
नेपाल तरूण दल भरतपुर २६ का सभापति किरण घिमिरको सभापतित्वमा कार्यक्रम सम्पन्न भएको थियो ।
