सिड्नी, अस्ट्रेलिया — ग्रेटर सिड्नी नेपाली बहुसांस्कृतिक केन्द्र (GSNMC) निर्माणको साझा सपनालाई साकार बनाउन सिड्नीको बरवुड पार्कमा तीन दिनसम्म सम्पन्न आध्यात्मिक महोत्सव उत्साहपूर्वक सम्पन्न भएको छ।
महोत्सवमा भक्तजन, समुदायका सदस्य तथा दाताहरूको उल्लेखनीय सहभागिता देखियो। महोत्सवमार्फत १ सयभन्दा बढी दाताबाट २५ लाखभन्दा बढी अस्ट्रेलियन डलर संकलन भएको अध्यक्ष विष्णु हमालले जानकारी दिए।

उनीका अनुसार, महोत्सवमा आजीवन सदस्यता लिने संख्या पनि १ हजार नाघेको छ। ‘विविध कारणले थुप्रै दाताहरू महोत्सवमा छुट्नुभएको हुनसक्छ,’ अध्यक्ष हमालले भने, ‘त्यसैले महोत्सव सकिए पनि सचेतना र अर्थ संकलन अभियान निरन्तर चल्नेछ।’

सिड्नीमा नेपाली पहिचान, संस्कृति तथा आध्यात्मिकताको संरक्षण एवं प्रवर्द्धनका लागि मिनी नेपाल निर्माण गर्ने उद्देश्यले आयोजना गरिएको महोत्सव भविष्यका पुस्ताहरूका लागि साझा सामुदायिक, बहुसांस्कृतिक केन्द्र निर्माण गर्ने अभियान हो भन्ने सन्देश दिइएको छ।

अधिक दान गर्नेहरूमा न्यु साउथ वेल्स राज्यका अवैतनिक नेपाली वाणिज्यदूत सन्जिव शर्मा र शर्मिला लुइँटेल तथा एक्स्पर्ट एजुकेशनका निर्देशक बद्री अर्याल र सम्झना अर्याल छन्, जसले संयुक्त रूपमा २ लाख १ हजार डलर योगदान गरे। पूर्ववाणिज्यदूत दीपक खड्का र उनकी श्रीमती लिसाले १ लाख १५ हजार १०० डलर, एन्टा अष्ट्रेलियाका सुभांश साहले १ लाख ११ हजार १११ डलर, घनश्याम चापागाईं दम्पतीले १ लाख ६ हजार ६६६ डलर, डा. प्रविण पाठक र सुनिता गिरीले १ लाख १ हजार १११ डलर दान गरेका छन्।

जग्गा खरिदको लागि १ वर्षको योजना बनाइएको छ, जहाँ दाताले शुरुमै कुल रकमको ५ प्रतिशत जम्मा गर्नेछन् र बाँकी जग्गा तथा भवन निर्माणका बेला तिर्नुपर्नेछ।

महोत्सवको पहिलो दिन १,२०८ कलश यात्री सहभागी थिए। महोत्सव सफलतापूर्वक सम्पन्न भएको खबर आयोजकले जारी गरेका छन्।
महोत्सव सकिए पनि नेपाली बहुसांस्कृतिक केन्द्र निर्माणका निम्ति सचेतना र अर्थ संकलन अभियान निरन्तर चल्ने आयोजकले बताएका छन्  ।