भरतपुर, पौष २६ ।चितवनमा कात्तिकदेखि घट्दै गएको कोरोना सङ्क्रमण पुसको अन्तिम साता आएर ह्वात्तै बढ्न थालेको छ । स्वास्थ्य कार्यालय चितवनका जनस्वास्थ्य अधिकृत गीताञ्जली ढकालका अनुसार जिल्लामा रहेका चार वटा पिसिआर ल्याबमा गरिएको परीक्षणका क्रममा पुस २६ गते (पछिल्लो २४ घन्टालाई आधार मान्दा) चितवनका ४१ जनामा कोरोना देखिएको थियो ।
भरतपुर महानगरपालिकामा २९, रत्ननगर नगरपालिकामा ५, माडी नगरपालिकामा ३, राप्ती नगरपालिकामा ३ जना र खैरहनी नगरपालिकामा १ जना संक्रमित थपिएका छन् । चितवनमा सक्रिय संक्रमितको संख्या बढेर ११९ पुगेको स्वास्थ्य कार्यालय चितवनले जनाएको छ ।
पुसको तेस्रो सातासम्म ५ देखि १२ जना सम्ममा कोरोना देखिएकोमा २६ गतेको परीक्षणमा बढेर ४१ पुगेको हो ।
चितवनमा सातजना अस्पताल आइसोलेशनमा र ११२ जना होम आइसोलेशनमा रहेका छन् । यस अघिका दिनमा सङ्क्रमितको सङ्ख्या कम थियो । पुस २४ गते एक जनामा सङ्क्रमण देखिएको थियो । २३ गते ११, २२ गते ९, १८ गते १२, १२ गते ६, पुस १ गते ५ जनामा सङ्क्रमण देखिएको थियो । एकाएक यो सङ्ख्या बढेको हो ।
चालू आर्थिक वर्षको तथ्याङ्क हेर्ने हो भने जिल्लामा साउन ७ गते २५५ जनामा कोरोना सङ्क्रण देखिएको थियो । साउनको महिना दैनिक २०० हाराहारीमा कोरोना सङ्क्रमण देखिएकोमा भदौमा यो सङ्ख्या घटेर एक सयको हाराहारीमा आएको थियो।
यस्तै असोज-कात्तिकमा ५० को हाराहारीमा रहेको कोरोना सङ्क्रमण मङ्सिरमा २० देखि ३० जनामा देखिन थालेको थियो। यसरी घट्दै गएको सङ्क्रमणको अनुपात अहिले आएर फेरि बढ्न थालेको ढकालले बताइन् । उनका अनुसार एक सातापछि कोरोना सङ्क्रमण दर उच्च बन्ने खतरा छ । सबैलाई स्वास्थ्य मापदण्डको पालना गरी काम गर्न कार्यालयले आग्रह गरेको छ ।
