भरतपुर । कृषि सामग्री कम्पनी भरतपुरको गोदाम यतिबेला रित्तो छ । एक दाना रासायनिक मल पनि गोदाममा छैन । मल लिन आएका किसानहरु यतिबेला रित्तो गोदाम हेरेर फर्किरहेका छन् ।

मकै, चैते धानलगाउने तयारी गरिरहेका किसानहरु मल नपाएर हैरानी खेपिरहेका छन् । यस्तै, तरकारी तथा केरा किसानहरुले पनि मल पाउन सकेका छैनन् । कृषि सामग्री कम्पनीको गोदाममा अनुदानको एक दाना पनि रासायनिक मल नहुँदा किसानहरु बिनामल खेतीपाती गर्न बाध्य भएका छन् ।

कृषि सामग्री कम्पनीका प्रमुख राजन बगालेका अनुसार मल नहुँदा कृषि सहकारी तथा एग्रोभेटहरु रित्तो हात फर्किरहेका छन् । उनले भने, ‘किसानहरुलाई रित्तो हात फर्काउने मन छैन, तर बाध्य भएका छौँ । एक दाना पनि मल यतिबेला छैन । गोदामहरु रित्तो छन् ।’

उनका अनुसार चैते धान लगाउने सिजन आउँदैछ । मकै लगाउने बेला आइसक्यो । कति किसानले मकै लगाइसके । तर मलको गोदाम रित्तो हुँदा किसानलाई मात्र होइन, हामीलाई समेत चिन्ता बढिरहेको छ । ‘अन्तर्राष्ट्रिय बजारमा मलको भाउ बढेको छ, सरकारले टेन्डर आह्वान गर्न सकिरहेको छैन’ प्रमुख बगालेले भने, ‘चैते धानको सिजनमा डिएपी मल आउँछ भन्ने आशा लागेको छ । पोटास र युरिया मल त झट्टै आउँदैन ।’

भरतपुर–६ गौरीगञ्जका पीताम्बर सापकोटाका अनुसार अब धान र मकै लगाउने बेलामा मलको हाहाकार भए किसानहरु थप मारमा पर्छन् । उनले भने, ‘यो बेलामा मलको त्यति माग छैन, तर अब मलको आवश्यक पर्ने बेला आइसक्यो, तर कम्पनीले मल नभएको सूचना किसानहरुलाई दिइरहेको छ ।’

उनले अबको एक महिनाभित्र पनि मल नआए किसानले चैते धान र मकैमा हाल्ने मल नपाउने बताए । उनले भने, ‘चैते धानको सिजन आउँदैछ, मकै त रोप्न थालिसके, तर रासायनिक मलको अभाव छ ।’

कृषि सहकारीहरु तथा एग्रोभेटहरुले कृषि सामग्री कम्पनीबाट एक महिनाअघि रासायनिक मल लगेका थिए । अहिले सहकारी तथा एग्रोभेटहरुमा पनि मल सकिएको छ । किसानहरु मल नपाउने चिन्तामा बसिरहेका किसान सापकोटाको भनाइ छ ।

विगतका वर्षहरुमा किसानहरु पनि कृषि सहकारीहरुमा घन्टौँ लामो लाइनमा बसेर भए पनि मल पाइरहेका थिए । यसपटक कृषि सामग्रीको गोदाममै मल नभएपछि किसानहरु रित्तो हात फर्किरहेका छन् ।

कृषि सामग्री कम्पनी भरतपुरका प्रमुख राजन बगालेले भने, ‘डिएपी मलको टेन्डर आह्वान भइसकेको छ, छिटै आउला । चैते धान रोप्ने बेला डिएपी मल किसानले पाउँछन् भन्ने लागेको छ ।’ उनले मल आएपछि तत्काल कृषि सहकारी तथा एग्रोभेटहरुलाई पठाउने बताए । कृषि सामग्री कम्पनीले चितवनका एग्रोभेट र कृषि सहकारी गरी ३०० भन्दा बढी बिक्री केन्द्रहरुलाई मल वितरण गर्दै आएको छ ।

चितवनमा कृषि सामग्री कम्पनी र साल्ट ट्रेडिंग कर्पोरेसनले अनुदानको मल कृषि सहकारी तथा एग्रोभेटहरुलाई वितरण गर्दै आएका छन् । यतिबेला साल्ट  ट्रेडिंग कर्पोरेसनमा पनि मल अभाव भएको बताइएको छ । चितवनमा १२ हजार मेट्रिक टनको रासायनिक मलको माग छ । मागअनुसार मल नआउँदा चितवनका किसानले बर्सेनि मलको अभाव झेल्न बाध्य भएका छन् ।

समाचार स्रोत : चितवन पोस्ट दैनिक