पूर्वाधार निर्माण कार्यलाई तीव्रता दिन त्रिभुवन अन्तर्राष्ट्रिय विमानस्थल आगामी ४ जेठसम्म दैनिक ७ घण्टा बन्द गरिने भएको छ। विमानस्थलको टर्मिनल व्यवस्थापन महाशाखाका प्रमुख इन्दुराज अधिकारीका अनुसार, ‘पेभमेन्ट कन्स्ट्रक्सन’ कार्यका लागि हरेक राति ११:४५ बजेदेखि बिहान ६:३० बजेसम्म उडान तथा अवतरण पूर्ण रूपमा स्थगित गरिनेछ।
हाल विमानस्थलको धावनमार्ग नजिकको ट्याक्सी–वे क्षेत्रमा निर्माण कार्य भइरहेको छ। सुरक्षालाई मध्यनजर गर्दै रातिको समयमा विमानस्थल पूर्ण रूपमा बन्द गर्ने निर्णय गरिएको हो।
विमानस्थल कार्यालयले जारी गरेको सूचनामा निर्माण कार्यलाई छिटो सम्पन्न गर्न यस्तो व्यवस्था गरिएको उल्लेख छ। साथै, उडानमा पर्ने असरलाई न्यून गर्न हवाई सेवा प्रदायकहरूलाई आवश्यकतानुसार उडान तालिका समायोजन गर्न आग्रह गरिएको छ।
