क्यानडाले नेपाललाई ८१ रनकाे लक्ष्य दिएकाे छ। ओमानको अल अमेरात क्रिकेट मैदानमा टस जितेर पहिले ब्याटिङ गर्ने निर्णय गरेकाे क्यानडाले १५ ओभरमा अलआउट हुँदै ८० रन जाेड्याे।
आइसिसी पुरुष टी–ट्वान्टी विश्वकप ग्लोबल छनोट अन्तर्गत साेमबार क्यानडा विरुद्धको खेलमा नेपालकाे उत्कृष्ट बलिङ र फिल्डिङका अगाडि क्यानडाका कुनै पनि ब्याट्सम्यान चल्न सकेनन्।
नेपालका लागि कमलसिंह ऐरीले २, कप्तान सन्दीप लामाछानेले ३, अविनाश बाेहाेराले २ र कुशल मल्लले १ विकेट लिए । कप्तान लामिछानेले ४ ओभरमा १२ रन खर्चेर ३ विकेट लिए। लामिछानले क्यानडाका हमजा तारिक, कलीम साना र जुनैद सिद्दिकीलाई आउट गरे।
कमलसिंह ऐरीले ३ ओभरमा १६ रन खर्चेर २ विकेट लिए । ऐरीले पहिलो ओभरको पाँचौँ बलमा क्यानडाका म्याथ्यू स्पोर्सलाई शून्य रनमा पेभेलिएन फर्काए। ऐरीले फ्यालेको बल छक्का हान्न खोज्दा मिड विकेटमा बसेका कुशल भुर्तेलले क्याच गरे। त्यस्तै, ऐरीले नै अर्को विकेट लिँदै क्यानडाका कप्तान नवनीत धालिवाललाई पनि खेलबाहिर पारिदिएका थिए।
क्यानडाका कप्तान नवनीत धालिवालले १४ बलमा १८ , रायन पठानले ११ बलमा १४ र डिलन हेलिगरले २२ बलमा २४ रन बनाए।
सन्दीप लामिछानेको कप्तानीमा नेपालका तर्फबाट कुशल भुर्तेल, आशिफ शेख, ज्ञानेन्द्र मल्ल, दिपेन्द्रसिंह ऐरी, आरिफ शेख, लोकेश बम, शरद भेष्वाकर, कमल ऐरी, अविनाश बोहरा, जितेन्द्र मुखिया मैदानमा उत्रिएका छन्।
विश्वकप छनोट अन्तर्गत नेपालले क्यानडाविरुद्धको जित हात पार्दै सेमिफाइनलको यात्रा तय गर्ने दाउमा छ। समूहका अघिल्ला दुवै खेल जितेको नेपाल सेमिफाइनल नजिक छ । प्रतियोगिता अन्तर्गत नेपालले यस अघि आयोजक ओमान र फिलिपिन्सलाई पराजित गरेको थियो।
यता क्यानाडा पनि नेपाललाई पराजित गरेर अन्तिम चारको सम्भावना कायमै राख्न चाहन्छ। यो समाचार तयार पार्दा सम्म नेपालको ३ ओभरको समाप्तिमा १४ रन बनाएको छ।
