लामो समय देखि सर्दै आइरहेको नेपाली कांग्रेस चितवनको नयाँ नेतृत्वका लागि आज भएको मतदानमा २ हजार ८ सय २० मत खसेको छ । नारायणगढस्थित नारायणी कलामन्दिरमा विहान १०ः३० बजेदेखि अपरान्ह ६ः३० बजेसम्म मतदान चलेको थियो । कुल २ हजार ९४५ मतदाता रहेकोमा उक्त मत खसेको निर्वाचन समितिले चित्रवन खबरलाई जानकारी दिएको छ।

मतपेटिकालाई कलामन्दिर भित्रको हलमा राखिएको छ । सभापतिका उम्मेद्वारहरुले मतपेटिकाका जाँच गरेर निस्किएका छन् । समितिका अनुसार राति १० बजेदेखि सभापति पदको मतगणना हुने र कुनै पनि उम्मेद्वारले ५१ प्रतिशत मत प्राप्त गर्न नसके दोस्रो चरणमा मतदान भोलि हुने पनि जानकारी प्राप्त भएको छ।

सभापतिका लागि पाँच जना चुनावी मैदानमा छन् । संस्थापन समूहबाट मिलनबाबु श्रेष्ठ र संस्थापनइतर समूहबाट राजेश्वर खनाल, उत्तम जोशी, डा.सूर्यकान्त घिमिरे र कैलाश कोइराला छन् । खनाललाई शेखर कोइरालाको राम्रो साथ छ भने जोशीलाई डा.शशांक कोइराला र घिमिरेलाई रामचन्द्र पौडेलको साथ छ । कोइरालालाई भने कुनै समूहले पनि आफ्नो मानेको छैन तथापि उनि भने सभापतिमा राम्रो सम्भावनामा रहेको पनि मतदान स्थलमा प्रतिनिधिहरुको आंकलन रहेको छ। साथै सचिव पदमा उम्मेद्वार रहेका सुर्य ढकालको पनि प्रवल सम्भावना रहेको प्रतिनिधिहरु बताउँछन्।