चितवन, चैत्र १४  – चितवन जिल्लामा ८४ हजार मतदाता थपिएका छन् । निर्वाचन आयोगले बैशाख ३० गते हुने स्थानीय तहको निर्वाचनका लागि आइतबार अन्तिम मतदाता नामावलीको टुंगो लगाएको छ ।

आयोगले सार्वजनिक गरेको नामावली अनुसार यस पटक चितवनमा ८४ हजार ६८२ जना नयाँ मतदाता थप भएका हुन् ।  चितवनमा कुल तीन लाख ९७ हजार ६८५ जनाको नामावली सार्वजनिक भएको छ । जिल्ला निर्वाचन कार्यालयले तीन लाख ९९ हजार ८७१ जनाले मतदाता नामावली आयोगमा पठाएको थियो । गत २०७४ सालको स्थानीय तह चुनावमा चितवनमा तीन लाख १३ हजार तीन जना मतदाता रहेका थिए ।

कुल मतदाता मध्ये महिलाको संख्या धेरै रहेको छ । आयोगका अनुसार चितवनमा महिला मतदाता दुई लाख चार हजार ६६७ जना रहेका छन् । भने पुरुष एक लाख ९३ हजार १८ जना रहेका छन् । अन्य एक जना छन् ।

भरतपुरमा धेरै, इच्छाकामनामा कम

चितवनका सात पालिका मध्ये भरतपुर महानगरपालिकामा सबै भन्दा धेरै मतदाता रहेका छन् । भरतपुरमा एक लाख ८५ हजार ७५२ जना मतदाता रहेका छन् । ति मध्ये ८८ हजार ८८४ पुरुष हुन् भने ९६ हजार ८६७ महिला हुन् । अन्य एक जना रहेका छन् ।

सात पालिका मध्ये इच्छाकामना गाउँपालिकामा सबै भन्दा कम मतदाता रहेका छन् । आयोगका अनुसार इच्छाकामनामा आठ हजार २४२ पुरुष र सात हजार ३९२ महिला गरी कुल १५ हजार ६३४ मतादाता रहेका छन् ।

कालिका नगरपालिकामा १५ हजार ५६० पुरुष र १५ हजार ५९७ महिला गरी कुल ३१ हजार १५७, खैरहनीमा २० हजार ७३२ पुरुष र २२ हजार ७९९ महिला गरी ४३ हजार ५३१ तथा माडीमा १३ हजार ७५८ पुरुष र १४ हजार ५६२ पुरुष गरी २८ हजार ३२० मतदाता रहेका छन् ।

यस्तै रत्ननगरमा ५२ हजार ६४२ जना मतदाता रहेका छन् । जस मध्ये २५ हजार ३४७ पुरुष हुन् भने २७ हजार २९५ महिला हुन् । उता राप्तीमा २० हजार ४९५ पुरुष र २० हजार १५४ गरी ४० हजार ६४९ मतदाता रहेका छन् ।

७५ मतदान केन्द्र थपिए

बैशाख ३० मा हुने स्थानीय तह निर्वाचनका लागि चितवनमा ७५ मतदान केन्द्र थप भएका छन् । जिल्ला निर्वाचन कार्यालय चितवनका अनुसार यस पटक चार सय ५१ मतदान केन्द्र तय भएका छन् । गत २०७४ को स्थानीय तह निर्वाचनमा तीन सय ७६ मतदान केन्द्र रहेका थिए ।

कार्यालयका निर्वाचन अधिकारी भिमसेन कार्कीका अनुसार सबै भन्दा धेरै भरतपुर महानगरपालिकामा दुई सय दुई मतदान केन्द्र रहेका छन् । यस्तै इच्छाकामनामा इच्छाकामनामा २२, कालिकाका ३७, खैरहनीमा ५१, माडीमा ३२, रत्ननगरमा ६० र राप्तीमा ४७ मतदान केन्द्र रहेका छन् ।

यस्तै यस पटक एक सय ६१ मतदान स्थल तय भएका छन् । जस अनुसार इच्छाकामनामा १४, कालिकामा ११, खैरहनीमा १७, भरतपुरमा ६५, माडीमा १५, रत्ननगरमा २१ र राप्तीमा १८ मतदान स्थल रहेका छन् । २०७४ को स्थानीय तह निर्वाचनमा पनि एक सय ६१ नै मतदान स्थल रहेका थिए ।

रावल चितवनको प्रमुख निर्वाचन अधिकृत

स्थानीय तह निर्वाचनका लागि निर्वाचन आयोगले आयोगले चितवनको प्रमुख निर्वाचन अधिकृत हेमन्त रावललाई तोकेको छ । चितवन जिल्ला अदालतका न्यायाधिश रावल भरतपुर महानगरपालिकाको निर्वाचनमा खटिनेछन् ।

रत्ननगर नगरपालिकाको निर्वाचन अधिकृतको रुपमा राष्ट्रिय सतर्कता केन्द्रका उपसचिव विनोद कुमार गौतमलाई तोकिएको छ भने जिल्ला प्रशासन कार्यालय चितवनका सहायक प्रमुख जिल्ला अधिकारी शिवप्रसाद रिजाललाई राप्ती नगरपालिकाको निर्वाचन अधिकृत तोकिएको छ ।

यस्तै खैरहनीको निर्वाचन अधिकृत खैरहनी नगरपालिकामा मुख्यमन्त्री तथा मन्त्रिपरिषद्को कार्यालय बागमती प्रदेशका उपसचिव सरस्वती पौडेल, माडी नगरपालिकामा जिल्ला समन्वय समिति चितवनका समन्वय अधिकारी चुडामणि शर्मा गौतम र इच्छाकामना गाउँपालिकामा चितवन जिल्ला अदालतका स्रेस्तेदार ईश्वर आचार्यलाई तोकिएको छ ।

स्रोत : a2zsamachar