भरतपुर, चैत १९- चितवनमा पेट्रोल तथा डिजेल अभाव सुरु भएको छ । पेट्रोलियम क्षेत्रका तीन वस्तुगत संगठन आन्दोलित बनेपछि चितवनमा इन्धन अभाव सुरु भएको हो । शुक्रबार राती लामबद्ध बनेका चालहरुले सवारीमा इन्धन राख्न पाएका छैनन् । भरतपुर, नारायणगढ क्षेत्रका अधिकाँस पेट्रोल पम्पहरु बन्द भैसकेका छन् ।
चितवन पेट्रोलिय डिलर्स एशोसियसन चितवनका अध्यक्ष काशिराज पाठकले ३ दिनलाई पुग्ने इन्धन करिब सकिएको बताउनुभयो । उहाँका अनुसार आइतबारदेखि अत्यावश्यक सेवाका लागि एम्बुलेन्स, दमकल, शवबाहन सवारीका लागि तोकिएका पेट्रोलपम्मप बाट मात्रै इन्धन वितरण गरिनेछ । अन्य पेट्रोल पम्प भने पूर्णरुपमा बन्द रहने बताउनुभयो । चितवनमा ५५ वटा पेट्रोल पम्प रहेका छन् । चितवनका पेट्रोल पम्पहरुमा ६ हजार देखि ७० हजार लिटर पेट्रोल र ३० हजारदेखि १ लाख लिटरसम्म डिजेल भण्डारण क्षमता रहेको छ ।
चितवनमा दैनिक १ लाख लिटर पेट्रोल र ४ लाख लिटर डिजेल खपत हुनेगर्छ । अध्यक्ष पाठकले आज दिउसोसम्म विक्रि वितरण भएर पेट्रोल पम्पमा रहेको मौज्दात विवरण जिल्ला प्रशासन कार्यालयमा बुझाइने बताउनुभयो । राष्ट्रिय पेट्रोलियम व्यवसाय संस्थागत समन्वय समितिको आव्हानमा चितवनमा पनि आन्दोलन सुरु भएको हो । इन्धन ढुवानी भाडालाई डिजेलको मूल्य अनुपातमा घटबढ हुनेगरी स्वचालित प्रणाली कायम गर्नुपर्ने, पेट्रोलियम व्यवसायीले पाइरहेको कमिसन वृद्धि गर्नुपर्ने लगायत माग राख्दै आन्दोलित बनेका हुन् ।
