स्थानीय तहको निर्वाचन आउँन करिव एक महिना मात्रै बाँकी छदा चितवनमा चुनावी सरगर्मी बढेको छ । विशेषगरि सत्तारुढ गठबन्धनले चुनावमा पनि तालमेल गरेर अघि बढ्ने निर्णय गरेपछि चितवन झनै चर्चामा छाएको छ । भरतपुर महानगरपालिकामा नेपाली कांग्रेस र नेकपा (माओवादी केन्द्र)ले दावी नछाडेपछि भरतपुरको चुनावी सरगर्मी तातेको छ ।
यसपटक कांग्रेस कुनै पनि हालतमा भरतपुरको मेयर माओवादीलाई छाड्न तयार छैन । कांग्रेस जिल्ला समितिले भरतपुर महानगरपालिकाको मेयर लिएर मात्रै तालमेल गर्न सकिने निर्णय नै गरेको छ । अन्यथा गठबन्धनका अन्य उम्मेद्वारलाई नसघाउने निर्णयले पनि देशभर चर्चा पाएको छ ।
कांग्रेस चितवनले स्थानीय स्तरमा वृहत छलफलबाट आएको सुझावको आधारमा मेयर नछाड्ने निर्णय गरेको थियो । कांग्रेसको तल्लो तहमा कुनै पनि हालतमा माओवादीलाई नछाड्ने बलियो मत छ । भरतपुरका २९ वटै वडाका कांग्रेस सभापतिहरुको अडानले पनि त्यसलाई पुष्टि गर्छ ।
नेपाली कांग्रेस भरतपुर–१५ का वडा सभापति ज्योति कंडेल कुनै पनि हालत भरतपुरको मेयर छोड्न नहुने अडान राख्छन् । ‘भरतपुरमा कांग्रेस सधै बलियो हो, पहिले माओवादीलाई छोड्यौं, यसपटक कांग्रेसलाई छोड्न प¥यो’–सभापति कंडेलले भने ।
भरतपुरमा सबैभन्दा धेरै क्रियाशिला सदस्य वडा नं.१५ मा नै रहेको छ । उनले स्थानीय कार्यकर्ता र मतदाताको चाहना कांग्रेसकै मेयरमा उम्मेद्वार होस् भन्ने रहेकाले सोही अनुसार पार्टीले निर्णय गर्नुपर्ने बताए । ‘यसपटक कांग्रेसले रुख बाहेक भोट हाल्दैनन्, जबरजस्ती गरिए निर्णय राम्रो आउदैन ।’–कंडेलले भने ।
भरतपुर १४ का वडा सभापति राजेन्द्र साँखी यसपटक भरतपुरको मेयरमा अरु पार्टीका उम्मेद्वारलाई भोट हाल्न नसकिने स्पष्ट पारे । ‘यसपटक भरतपुरको मेयर नपाए हामी भोट हाल्दैनौं, पार्टीले तानाशाही लाद्यो भन्दैमा सबै निर्णय मान्नुपर्छ भन्ने छैन’–साँखीले भने । उनले सबै वडा सभापतिहरु गठबन्धन बिरोधी नभए पनि भरतपुरको मेयर लिएर मात्रै गठबन्धन गर्न सकिने स्पष्ट पारे । ‘हामी गठबन्धन बिरोधी होइनौं, तर सैद्धान्तिक रुपमा गठबन्धन गर्दै गर्दा आलोपालो हुनुपर्छ, सधै पटक–पटक एकै ठाउँका कांग्रेसले छोड्नुपर्छ भन्ने छैन’–उनले भने । उनले २०७४ को स्थानीय तहमा पनि माओवादीलाई सहयोग गरिएकोले यसपटक माओवादीले कांग्रेसलाई सहयोग गर्नुपर्ने बताए ।
‘राष्ट्रिय गठबन्धनको नाममा पटक–पटक एउटै पार्टी र एउटै व्यक्तिलाई छोड्न सकिदैन, यसले अन्य संगठनको धरातल कमजोर हुन्छ, यसपटक हामी कुनै पनि हालतमा छोड्नेवाला छैनौं’–भरतपुर–७ का वडा सभापति विनोद ढकालले भने । उनले यसपटक भरतपुर बाहेक महानगर माओवादीलाई दिन सुझाव दिए ।
भरतपुरका सबै वडा सभापतिहरुले यसपटक भरतपुरको मेयर नछाड्ने भन्दै हस्ताक्षर नै गरेका छन् । कांग्रेस चितवनका सभापति राजेश्वर खनालले सबै वडा सभापतिले एक स्वरमा यसपटक भरतपुरको मेयर छोड्न नहुने अडान राखेको बताए । ‘सबै सभापतिहरु एकजुट हुनुहुन्छ, हामी सोही अनुसार भरतपुरको मेयर नछोड्ने निर्णय जिल्ला समितिले गरेको छ’–सभापति खनालले भने ।
भरतपुर महानगरको मेयरमा नेकपा (माओवादी केन्द्र)ले दावी गर्दै आइरहेको छ । केहीदिन पहिले चितवन आएका माओवादी अध्यक्ष पुष्पकमल दाहाल ‘प्रचण्ड’ले भरतपुरमा माओवादीको दावी रहेको जिकिर गरेका थिए । तर कांग्रेस चितवनले यसपटक भरतपुर महानगरको मेयर नै बटमलाइन भन्दै आइरहेको छ ।
