इण्डियन प्रिमियर लिग (आईपीएल) क्रिकेटमा रोहित शर्मा कप्तानीको मुम्बई इण्डियन्स लगातार छैटौँ खेलमा पराजित भएको छ।
यसअघि लगातार पाँच खेलमा हार व्यहोरेको मुम्बई शनिबारको खेलमा लखनऊ सुपर जाइन्टस्सँग १८ रनले पराजित भएको हो।
मुम्बईको ब्राबोन स्टेडियममा मुम्बईले टस जितेर फिल्डिङ रोजेपछि पहिले व्याटिङ गरेको लखनऊले निर्धारित २० ओभरमा ४ विकेटको क्षतिमा १९९ रन बनाएको थियो।
लखनऊका लागि कप्तान केएल राहुलले शतक प्रहार गरे। ६० बलको सामना गरेका उनले ९ चौका र ५ छक्काको मद्दतमा १०३ रन बनाए। यस्तै मनिष पाण्डेले ३८, क्वीन्टन डी ककले २४, दीपक हुडाले १५ र मार्कुस स्टोनिसले १० रन बनाए।
बलिङतर्फ मुम्बईका जयदेव उनाड्कटले दुई तथा मुरुगन अश्विन र फेबियन एलनले एक–एक विकेट लिए।
२०० रनको लक्ष्यसहित जवाफी व्याटिङ थालेको मुम्बईले निर्धारित २० ओभरमा ९ विकेटको क्षतिमा १८१ रन मात्रै बनाउन सक्यो। उसका लागि सूर्यकुमार यादवले ३७, डेवाल्ड ब्रेभिजले ३१, तिलक बर्माले २६ र किरन पोलार्डले २५ रन बनाए पनि त्यो जितका लागि पर्याप्त भएन
लखनऊका अवेश खानले तीन तथा जेसन होल्डर, दुश्मन्थ चमीरा, रवी विस्नोइ र मार्कुस स्टोनिसले एक–एक विकेट लिए। आजको जितसँगै लखनऊ ८ अंकसहित अंकतालिकाको दोस्रो स्थानमा उक्लिएको छ भने मुम्बई पुछारमा छ।
