नेपाली कांग्रेसका महामन्त्री गगनकुमार थापाले नेकपा एमालले पछिल्लो पाँच वर्षको देश चलाउने जिम्मा लिएर पूरा गर्न नसकेकोमा माफी माग्नुपर्ने बताएका छन्।

काठमाडौंमा बुधबार आयोजित पत्रकार सम्मेलनमा उनले २०७४ सालको चुनावमा बहुमत पाएको एमाललेले मत पाएअनुसार जिम्मेवारी पूरा गर्न नसकेकोमा माफी माग्नुपर्ने बताए।
उक्त चुनावमा नेपाली कांग्रेस प्रमुख प्रतिपक्षी बनेको थियो भने एमाले पहिलो दल बनेर देशको जिम्मा लिएको थियो। ‘देश हाँक्ने जिम्मा लिएर पहिलो पार्टी बनेको एमालले जिम्मेवारी पूरा गर्न नसकेकोले माफी माग्नु पर्छ,’ उनले भने, ‘स्थानीय सरकारमा कांग्रेसको पनि केही मिठो,नमिठो अनुभव भयो। अबको पाँच वर्ष हामीलाई जिम्मा दिनुस् त्यो जिम्मेवारी पूरा गर्न सकेनौँ भने भुईँमा पर्छादिनुस्।’

यो चुनावमा पहिलो पार्टी बनाएर देश हाँक्ने जिम्मा दिन उनले जनतासँग आग्रह गरेका छन्। पहिलो पार्टी बनेर जिम्मा पूरा गर्न नसके भुईँमा पछारिदिन उनले चुनौती दिए।
स्थानीय निर्वाचनलाई सफल पार्ने पहिलो र कांग्रेसलाई पहिलो दल बनाउने गरी मत ल्याउन पहल गर्ने दोस्रो कर्तव्य भएको उनले उल्लेख गरेका छन्।

गठबन्धनका दलहरुबीचको तालमेल उचित हो कि हैन भन्ने मतभिन्नता रहेको र यसबारे संघर्ष भोलिको दिनमा पनि हुने उनले बताए ।

उनले भने, ‘विभिन्न अवस्था र चरणमा कांग्रेसभित्र विभिन्न मत छन्। लामो छलफल गरेर माओवादीसँग तालमेलको निर्णय गरेको हो। कतिपय ठाउँमा पार्टीको निर्णय उल्लंघन भएको छ। तर पार्टीको निर्णय मान्नुपर्छ। एक्लै निर्वाचनमा होमिँदा त अप्ठेरो भएको थियो भने गठबन्धनसहित चुनावमा जाँदा अप्ठेरो छ।’

लामो समय पार्टीमा योगदान गरेका साथीहरु उम्मेदवारी दिनबाट बञ्चित भएकोमा उनले चिन्ता व्यक्त गरे।

निर्वाचनको बिषयलाई लिएर पार्टीभित्र आएका सबै असन्तुष्टि वेवास्ता गरेर नबसेको उनले बताए । पत्रकार सम्मेलनमा महामन्त्री थापाले निर्वाचनको सम्बन्धमा केन्द्रमा आएका उजुरी संकलन गरेको र निर्वाचनछि अध्ययन, विश्लेषण गरेर कारवाही गर्ने जानकारी दिए। चुनावमा होमिइसकेपछि पार्टीको निर्णयलाई सबैले सम्मानपुर्वक मान्नुपर्ने उनको भनाइ छ।

‘विभेद र अन्यायको क्षतिपूर्ति हुन्छ। पार्टीको कर्मठ साथीले आवेगमा आएर निर्णय गर्दा फेरि फर्केर आउने अवस्था हुँदैन। पार्टीभित्र भएका असन्तुष्टि सम्बोधन हुन्छ। स्थानीय तहको चुनावमा मत दिनुपर्ने दिन आउनै लाग्दासमेत तालमेलमै अल्झिनु दुखद हो। अघिल्ला प्रतिनिधिका कार्यक्षमताको मूल्याङ्कन गर्ने र अवको पाँचबर्षमा प्रतिनिधिले गर्ने कामबारे समीक्षा हुनुपर्नेमा दलहरुको तालमेलले चर्चा पाइरहेको छ,’ उनले भने।

प्रमुख प्रतिपक्षी दल नेकपा एमालेले केन्द्रमा चुनावी गठबन्धनको लेखाजोखा गरेर बसेको तर जिल्लामा संगठन बेहाल भएको थापाले बताए।

पत्रकार सम्मेलनमा पार्टीका केन्द्रीय सदस्य अजयबाबु सिवाकोटीले चुनावमा अनावश्यक सूचना तथा रणनीति चुहाउने काम नगर्न आग्रह गरेका छन्। अघिल्लो चुनावमा केहि स्थानमा यस्तो गल्ती भएको थियो यसलाई दोहोर्‍याउन दिन नहुनेमा उनले सजग गराएका हुन्। चुनाव प्रचार सामाग्री वितरण र आर्थिक परिचालन चुस्त बनाउन समन्वयन गर्न सम्बन्धित संयन्त्रलाई उनले आग्रह गरे।

घोषणापत्रमा भएका प्रतिवद्धता जनताको बिचमा लिएर जाने र जनताको एजेन्डा बनाउनपर्नेमा उनले जोड दिए। नेपाली कांग्रेसको जनतामुखी घोषणापत्र देखेर एमाले अध्यक्ष केपी शर्मा ओली आत्तिएको उनको भनाइ छ । ओली आत्तिएर कांग्रेसको घोषणापत्रलाई अनेक संज्ञा दिएको उनले बताए।