भरतपुर महानगरपालिकाको मेयरमा स्वतन्त्र उम्मेदवारी दिएका कांग्रेस नेता जगन्नाथ पौडेललाई उम्मेदवारी फिर्ता लिन पार्टीले निर्देशन दिइसकेको छ ।
काँग्रेस सभापति तथा प्रधानमन्त्री देउवाको निर्देशन पालना गर्दै गृहमन्त्री बालकृष्ण खाण र राज्यमन्त्री उमेश श्रेष्ठ भरतपुर गएर पौडेललाई उहाँकै घरमा भेटेर उम्मेदवारी फिर्ता लिन आग्रह गरेपनि पौडलले अश्विकार गर्नुभएको थियो ।
उता, पूर्वप्रधानन्यायाधीश गोपालप्रसाद पराजुलीसमेत उम्मेदवारी फिर्ता लिन आग्रह गर्दै भरतपुर आइपुग्नुभएको छ । उहाँले पनि पौडेललाई घरमै भेटेर एक्लै चुनाव नजितिने भन्दै उम्मेदवारी फिर्ता लिन आग्रह गरेका छन् ।
पूर्वप्रधानन्यायधीश पराजुलीले मेयरका उम्मेदवार पौडेललाई गत मंगलबार भेटेको र साथीभाइको हिसाबले सल्लाह दिएको बताउनुभयो । खाणले भने पौडेललाई गठबन्धन नै तलमाथि हुने भएकाले फिर्ता हुन दबाब दिएर र्फकनुभएको छ । उहाँले पौडेलका प्रस्तावक बयोवृद्ध नेता कृष्णलाल सापकोटालाई पनि भेटेर उम्मेदवारी फिर्ता गराउन आग्रह गर्नुभएको थियो ।
कांग्रेस जिल्ला सभापति राजेश्वर खनालले आग्रह गर्दा पनि पौडेल ब्याक नभएपछि गृहमन्त्री र केन्द्रीय नेतृत्व उहाँलाई फिर्ता गराउन प्रयासरत रहेको बेला उम्मेदवारमाथि मन्त्रीले नै मानसिक दबाब दिनु निर्वाचन आचारसंहिताविपरीत हुने विज्ञहरुले बताएका छन् ।
राज्य नै लागेर कुनै उम्मेदवारलाई दबाब दिनु आचारसंहिताभित्र पर्छ भन्ने प्रश्नमा निर्वाचन आयोगले पार्टीको तर्फबाट चिठी लेखेर फिर्ता लिन निर्देशन दिन सक्ने तर मन्त्री गएर दबाब दिन नपाइने जनाएको छ ।
आयोगका सूचना अधिकारी सूर्यप्रसाद अधिकारीले‘ सार्वजनिक पदमा रहनु भएका बहालवाला मन्त्री नै एक उम्मेदवारलाई उम्मेदवारी फिर्ता लिन दबाब दिनु र अर्को उम्मेदवारको पक्षमा उभिनु आचार सहिंता विपरीत भएको बताउनुभयो ।
