भरतपुर । नेपाली कांग्रेसबाट असन्तुष्ट भएपछि भरतपुर महानगरपालिकाको मेयर पदमा उमेदवारी दिएका जगन्नाथ पौडेलले स्थानीय सरकार आएपछि भरतपुर महानगरमा अनावश्यक करबाट जनता पीडित बनेको बताएका छन् । गीतानगरको विपी चोकमा सम्पन्न चुनावी सभालाई सम्बोधन गर्दै नेता पौडेलले भने, ‘महानगरले उठाएको करबाट जनता आजित भइसके, यदि तपाईंहरुले यसपटक भुइँकटहरमा मतदान गरेर जिताएमा त्यस्ता अनावश्यक कर खारेज गर्छु, र जनताको हितमा काम गर्छु ।’
थोरै कर संकलन गरेरै पनि महानगरलाई व्यवस्थित र सुशासनयुक्त बनाउन सकिने उनले बताए । नेपाली कांग्रेसमा रहेर निष्ठाको राजनीति गर्दै आएको दाबी गर्दै उनले भने, ‘भ्रष्टाचारमुक्त महानगर र सुशासनयुक्त महानगर बनाउन निष्ठाको राजनीति गर्ने मान्छेको अभाव छ ।’ पार्टीभित्र पनि सच्चा, इमानदार र निष्ठाको राजनीति गर्नुपर्छ भन्दा आममतदाताको मन दुखाएर आत्मसम्मानमा ठेस पु¥याएकोले रुखको ठाउँमा भुइँकटहर लिएर चुनाव लड्नु परेको उनले सुनाए । ‘हाम्रो आन्दोलन स्वाभिमानको आन्दोलन हो, हामीले कयौँ यातना सहेर पार्टी बचाएका छौँ । तर, आज हामीमाथि नै हँसी–मजाक भयो, जसले हाम्रो आत्मसम्मानमा ठेस पु¥यायो । त्यसैले, मैले उमेदवारी दिएँ’, उनले भने, ‘निष्ठाको राजनीति गर्न हाम्रा सबै नेता डराए, तर मलाई तपाईंहरुको माया, साथ र सहयोगले ऊर्जा दिएको छ ।’
स्थानीय सरकार आएपछि गाउँगाउँमा सिंहदरबार भनिए पनि महानगरमा एउटा जग्गाको चारकिल्ला प्रमाणित गर्न जाँदा १५ दिनसम्म धाउनु परेको आफ्नै भोगाइ सुनाउँदै उनले थपे, ‘जनतालाई एक÷दुई दिनमा सकिने काम दुई हप्ता लगाएर दुःख दिने गर्नुहुँदैन । त्यसैले आजको काम आजै, अहिलेको काम अहिल्यै गरेर देखाउने क्षमता जगन्नाथ पौडेलसँग छ ।’
आवश्यकताअनुसारको कर्मचारी व्यवस्थापन गरेर जनतालाई सहज हुने गरी सेवा दिन आफू तयार रहेको उनले प्रतिबद्धता जनाए ।
कार्यक्रमलाई सम्बोधन गर्दै नेपाली कांग्रेस चितवनका पूर्वसभापति टीकाराम न्यौपानेले कांग्रेस बचाउने अभियानमा लागेका व्यक्तिलाई जनप्रतिनिधि बनाएर महानगर पनि बचाउनुपर्ने दिन आएको बताए । गीतानगरबाटै राजनीतिक यात्रा गरेका पार्टीका केन्द्रीय सदस्य दिनेश कोइरालाहरुले जगन्नाथ पौडेलको अभियानमा साथ दिनुपर्ने भन्दै हिजोको आजै छुवाछूतको राजनीति नगरिदिन पनि उनले आग्रह गरे । भरतपुरको मेयर पदमा भुइँकटहरमा मतदान गरे पनि बाँकी सबै पदमा रुख चिन्ह नछाड्ने हुँदा गलत अर्थ नलगाइदिन पनि कांग्रेस जिल्ला समितिलाई उनले सुझाव दिए ।
‘मेयरमा रुख नभएकोले हामीले भुइँकटहर रोज्न बाध्य भयौँ’, उनले भने, ‘अन्य पदमा हामीले रुखलाई नै मतदान गर्ने हो, किनकि हामी आजीवन कांग्रेस हौँ ।’ आफ्नो मूलघर नै कांग्रेस भएको भन्दै उनीहरुले पार्टीको झन्डा बोकेरै चुनावी प्रचारप्रसार गरिरहेका छन् । यस विषयमा कांग्रेसको जिल्ला समितिले भने मौन असन्तुष्टि जनाएको छ । नेता पौडेल आफैँ कानुनको विद्यार्थी भएको नाताले कानुनका कुरा जिल्लाका अन्य व्यक्तिले बुझाइरहनु नपर्ने जिल्ला उपसभापति राजीव न्यौपानेले बताए । ‘पार्टीको केन्द्रीय समितिबाटै स्वतन्त्र बनाइसकेपछि उहाँ (जगन्नाथ पौडेल) स्वतन्त्र हुनुहुन्छ । अब स्वतन्त्र व्यक्तिले पार्टीको झन्डा बोक्ने या नबोक्ने भन्ने जिज्ञासा हामीले दिइराख्नुपर्दैन’, उनले भने, ‘किनकि उहाँ आफैँ कानुनको विद्यार्थी हुनुहुन्छ, त्यसैले कानुनका कुरा, आचारसंहिताका कुरा उहाँ आफैँले बुझ्नुपर्छ । उहाँ हाम्रो पनि अग्रज भएकोले हामीले सिकाइरहनुपर्ने कुरा होइन ।’
