काठमाडाैं,बैशाख-२५  :  पाँच वटा पत्रकार संगठनले सत्ता गठबन्धनलाई भोट मागेका छन् । एक विज्ञप्तिनै जारी गरेर सत्ता गठबन्धन निकट पत्रकारको संगठनले भोट मागेपछि सामाजिक सञ्जालमा आलोचना समेत भएको छ । बाम लोकतान्त्रिक गठबन्धनको पक्षमा मतदान गर्न मतदाताहरूमा अपिल गर्दै पत्रकार संगठनले भोट नहालेर हुने सानो भुलले देश फेरि द्वन्द्व र अस्थिरताको भूमरीमा जान सक्ने खतरा औंल्याएका छन् ।  यसरी विज्ञप्ति जारी गर्नेमा नेपाल प्रेस यूनियन,  प्रेस सेन्टर नेपाल, समाजवादी प्रेस संगठन, प्रेस मञ्च नेपाल र  प्रगतिशील पत्रकार संघ रहेका छन् । विज्ञप्तिमा लोकतन्त्रको मुख्य आधार स्तम्भको रुपमा लिइने आवधिक निर्वाचन समयमै सम्पन्न हुन गइरहेको कुराले हर्षित र गौरवान्वित भएको उल्लेख गरिएको छ ।

आफ्नो मत कस्तो दल र उम्मेदवारलाई दिने भन्ने कुरा महत्वपूर्ण हुने भन्दै विज्ञप्तिमा गलत राजनीतिक दल र उम्मेदवारलाई आफ्नो मत परेमा लोकतान्त्रिक विधि, प्रक्रिया र प्राप्त उपलब्धि नै खतरामा पर्ने अवस्था पनि सिर्जना हुन सक्नेतर्फ सचेत गराइएको छ । ‘त्यसैले आफ्नो मत दिनका लागि राजनीतिक दल र उम्मेदवार छनौटमा धेरै ध्यान दिनुपर्ने हुन्छ । अहिलेको निर्वाचनमा देशमा मुख्य दुई प्रवृत्ति देखिएका छन् । एउटा वैचारिक गठबन्धन छ, जसले हजारौंको बलिदान, त्याग र समर्पणबाट प्राप्त गणतन्त्र, संघीयता, समावेशीता समानुपातिक प्रतिनिधित्वसहितको लोकतान्त्रिक गणतन्त्रका उपलब्धीहरु र संविधानको रक्षा गर्ने, परिवर्तनका एजेण्डाहरुलाई संस्थागत गर्ने, स्थानीय तहलाई संविधान र संघीयताको मर्म अनुरुप अधिकार दिने । अर्को प्रवृत्ति छ– संविधानको हत्या गर्ने, जननिर्वाचित संस्था संसदको हत्या गर्ने, सबै परिवर्तनलाई उल्ट्याउने, देशमा निरंकुशताको अभ्यास गर्ने र स्थानीय तहलाई अधिकार दिन कन्ज्युस्याई गर्ने निरंकुश प्रवृत्ति । यो प्रवृत्तिले आफ्नै पार्टी र संसद विघटन गरेर न्यायपालिका समेतलाई आफ्नो प्रभावमा पार्ने असफल प्रयास गरेको थियो। पहिलो प्रवृत्तिको प्रतिनिधिको रुपमा सत्तारुढ पाँच दलीय बामलोकतान्त्रिक गठबन्धन अगाडि आएको छ । दोश्रो प्रवृत्तिको प्रतिनिधित्व प्रतिगमनको समेत नेतृत्व गर्ने नेकपा एमालेले गरेको छ’, विज्ञप्तिमा भनिएको छ,‘केपी ओली नेतृत्वको एमालेले प्रेस स्वतन्त्रता कुण्ठित गर्ने गरी विधेयक ल्याएको तथा स्थानीय तहलाई अधिकार दिन अस्वीकार गरेको, भ्रष्टाचारलाई संरक्षण गरेको कुरा दिनको घाममै छर्लङ्ग छ। यस अवस्थामा हामी संविधान, लोकतन्त्र र परिवर्तनका पक्षधर हुनुको नाताले देशमा राष्ट्रिय एकता कायम गर्न, संविधानको रक्षा गर्न, परिवर्तनका एजेन्डालाई संस्थागत गर्न, पूर्ण प्रेस स्वतन्त्रताको प्रत्याभूति गर्न र कानूनी राज्यको पालना गरी लोकतन्त्रको वास्तविक अभ्यास गर्नका लागि आफ्नो स्वतन्त्र विवेक प्रयोग गरी बाम लोकतान्त्रिक गठबन्धनको पक्षमा मतदान गर्न आम नेपाली मतदाता महानुभावहरूमा हार्दिक अपिल गर्दछौं।’

वैशाख ३० गते हुने स्थानीय तह निर्वाचनमा स्पष्ट रुपमा परिवर्तनका पक्षधर गठबन्धनका उम्मेदवारलाई  मत दिई विजयी बनाउन उनीहरुले अपील गरेका छन् ।